बिरस सुनार 

रुकुम पूर्व -१९, साउन ।

रुकुम पूर्वको भूमे गाउँपालिका वडानम्बर -३, काे सिमामा आइतबार विविध खेलकुद कार्यक्रमसँगै हरियाली मेला सुरु गरिएको छ । पुस्तौँदेखि मनाउँदै आएको ऐतिहासिक हरियाली मेलाको अवसरमा धान खेतमा पूजापाठ गरी खेलकुद कार्यक्रम सञ्चालन गरिएको हो ।

हरियाली मेलामा गाउँ स्तरीय पुरुष तथा महिला भलिबल, घैँटोफोर, रस्साकस्सी लगायत विभिन्न प्रतियोगिता आयोजना गरिएको छ । प्रतियोगितामा विजेता हुने समूह तथा व्यक्तिलाई आकर्षक पुरस्कार सहित मेडल र प्रमाणपत्रकाे व्यवस्था गरिएकाे हरियाली जन युवा क्लबका उपाध्यक्ष प्रकाश सुनारले बताए ।

यहाँको सीमा गाउँमा बर्खेबाली लगाउन सुरु गरे सँगै प्रत्येक किसानले असार देखि मध्ये साउन सम्म खेतबारीको काममा अनेक दुःख कष्ट सहनु पर्ने हुन्छ । तर साउन १५ पछि खेतिपातीको सबै काम सकिने र सोही खुसियालीमा हरियाली मेलाकाे आयाेजना गर्ने प्रचलन रहिआएको छ ।

हरियाली पर्वकाे अघिल्लो दिन सम्म गाउँका सबै किसानले आफ्नो खेतबारीकाे सम्पूर्ण काम सिध्याउनुपर्ने हुन्छ । काम सकेर मात्रै पुजा गर्ने चलन छ । यसरी खेतमा हरियाली पुजा गर्नाले किसानको खेतीपातीमा किरा-फट्याङ्ग्रा, चराचुरुङ्गी तथा प्राकृतिक प्रकोपले नोक्सान नगर्ने विश्वास रहेको छ ।