रुकुम पश्चिम -७, साउन ।
आज नेपाल कम्युनिष्ट पार्टी (नेकपा) का संस्थापक महासचिव पुष्पलाल श्रेष्ठको ४७औँ स्मृति दिवस मनाइँदै छ । नेकपा एमाले, माओवादी केन्द्र, एकीकृत समाजवादी लगायत कम्युनिष्ट पार्टीले विविध कार्यक्रम गरी दिवस मनाउँदै छन् ।
विसं १९८१ असार १५ गते रामेछापको भँगेरीमा जन्मिनुभएका पुष्पलाल श्रेष्ठले नै कार्लमाक्र्स र फेडरिक एङ्गेल्सद्वारा लिखित ‘कम्युनिष्ट मेनिफेस्टो’ (कम्युनिष्ट पार्टीको घोषणापत्र, सन् १८४८) को पहिलो पटक नेपाली भाषामा अनुवाद गरेका थिए ।
पहिलो पटक विभिन्न कृति र लेखमार्फत नेपाली समाजको वर्ग विश्लेषण गरेर नौलो जनवाद स्थापनाका लागि आह्वान गरेकाले पुष्पलाललाई नेपालका कम्युनिष्ट पार्टीले कम्युनिष्ट आन्दोलनको पिताको रुपमा मान्ने गर्दछन् ।
पुष्पलालले नै पार्टीको घोषणापत्रमा नेपाली क्रान्ति, नौलो जनवादको बाटोबाट अघि बढ्नुपर्ने कुरा सहित घोषणापत्र लेखेपछि उनकै नेतृत्वमा २००६ साल वैशाख १० गते नेपाल कम्युनिष्ट पार्टी (नेकपा) स्थापना भएको थियो ।
