रुकुम पश्चिम -२, साउन ।
राष्ट्रिय स्वतन्त्र पार्टी रुकुम पश्चिमले आजदेखि जनताको हस्ताक्षर अभियान संकलन सुरु गरेको छ । रवि लामिछाने माथि भएको राजनीतिक प्रतिशोध विरुद्ध सदरमुकाम मुसिकोट स्थित त्रिवेणी चोकबाट हस्ताक्षर अभियान सुरु गरेको हो ।
पार्टी सभापति मानबहादुर शाहीका अनुसार रुकुम पश्चिम जिल्लामा औपचारिक रूपमा जनताको हस्ताक्षर सुरु गरिएको छ । यस अभियानले जिल्लाभरबाट ३० हजार बढी जनताको हस्ताक्षर सङ्कलन गरिने उनको भनाई छ ।
आजदेखि सुरु गरिएको हस्ताक्षर अभियानमा जनताको स्वस्फूर्त समर्थन र सहयोग रहेको रास्वपा रुकुम पश्चिमले जनाएको छ । सदरमुकामबाट सुरु गरिएको यो अभियान जिल्लाका ६ वटै पालिकामा सञ्चालन गरिने छ ।
अभियान साउन महिनाभरि सञ्चालन गरिने बताइएको छ । तर रास्वपा रुकुम पश्चिमले यसअघि नै चौरजहारी नगरपालिकामा १ हजार ७ सय जनताको हस्ताक्षर सङ्कलन गरिएको बताएको छ ।
राष्ट्रिय स्वतन्त्र पार्टीले देशैभर रवि लामिछाने माथि भएको राजनीतिक प्रतिशोध विरुद्ध जनताको हस्ताक्षर सङ्कलन गरिरहेको छ । हालसम्म २५ लाख बढी हस्ताक्षर सङ्कलन गरिएको रास्वपाले दाबी गरेको छ ।
