रुकुम पश्चिम -२, साउन ।
रुकुम पश्चिममा पछिल्लो समय नेकपा माओवादी केन्द्रबाट पार्टी त्याग गर्नेको लहर चुलिन थालेको छ । पार्टी नेतृत्व सिद्धान्त विहीन भएर स्वार्थ केन्द्रित गतिविधिमा लागेको भन्दै माओवादी केन्द्रका कार्यकर्ताहरु पार्टीबाटै बाहिरिन थालेका छन् ।
माओवादी केन्द्र पार्टी परित्याग गर्नेमा सबैभन्दा बढी आठविसकोट नगरपालिका अग्र मोर्चामा देखिन्छ । यसको ज्वलन्त उदाहरण हो, ११ नम्बर वडाको बुर्ज्यामना गाउँ, जहाँ बिहीबार मात्रै एकैसाथ ५४ जनाले माओवादी केन्द्र पार्टी परित्यागको घोषणा गरेका छन् ।
उक्त सामूहिक पार्टी त्यागको घोषणाले यतिबेला रुकुम माओवादीलाई ठूलो झट्का लागेको छ । पार्टीको साधारण सदस्य नरहने गरी सामूहिक घोषणा गरेका माओवादी कार्यकर्ताले पछिल्ला केही वर्षदेखि पार्टी भित्र विकसित हुँदै गएको प्रवृत्ति सिद्धान्त भन्दा स्वार्थ, संगठन भन्दा गुट, र निष्ठा भन्दा पहुँच हाबी भइरहेको बताएका छन् ।
स्मरण रहोस् यहाँको आठविसकोट नगरपालिकामा दुवै पटकको स्थानीय तह निर्वाचनमा माओवादी केन्द्रले बाजी मारेको थियो । हाल यस नगरपालिकामा माओवादी केन्द्रबाट रवि केसी प्रमुख र धनकुमारी शाही उपप्रमुख छन् ।
तर, माओवादीबाटै निर्वाचित यहाँका जनप्रतिनिधिले सार्वजनिक आलोचना खेप्दै गर्दा आफ्नै पार्टी कार्यकर्ताले समेत अवसरवादी र चाकडी गर्नेलाई मात्रै स्थान दिएको आरोप र कार्यकर्ता रुष्टले माओवादी भित्रको उदाङ्गो नाच छर्लङ्ग भएको छ ।
पार्टी परित्यागको घोषणा गर्नेको विवरण तल छ ।
