रुकुम पश्चिम -२, साउन ।
नेकपा एकीकृत समाजवादी र नेकपा एकता राष्ट्रिय अभियानबिच आज पार्टी एकता हुँदैछ । दुई पार्टीले आज दिउँसो राष्ट्रिय सभा गृह काठमाडौँमा भव्य समारोहका साथ पार्टी एकताको घोषणा गर्दैछन् ।
घोषणा सभाबाट एकीकरणको सन्देश प्रवाह गरिने कार्यक्रममा नेकपा (एकीकृत समाजवादी) का अध्यक्ष माधवकुमार नेपाल, पूर्वप्रधानमन्त्री झलनाथ खनाल तथा नेकपा एकता राष्ट्रिय अभियानका अध्यक्ष वामदेव गौतमले सम्बोधन गर्ने केन्द्रीय प्रचार विभाग उपप्रमुख दामोदर अर्यालले जानकारी दिए ।
एकता सभामा पार्टी मातहतका कमिटीलाई अनिवार्य सहभागिताका लागि नेकपा एकीकृत समाजवादीले निर्देशन दिएको छ ।
दुवै पार्टीको राजनीतिक दर्शन, सिद्धान्त, कार्यक्रम, रणनीती र कार्यदिशामा एकरुपता रहेको र नेपालको कम्युनिष्ट आन्दोलनलाई एकतावद्ध गर्नुपर्ने आवश्यकतालाई ध्यानमा राख्दै एकताबद्ध हुने निर्णय गरिएको छ ।
घोषणा सभाबाट नेकपा एकता राष्ट्रिय अभियान नेकपा (एकीकृत समाजवादी) मा एकतावद्ध हुने छ ।
