रुकुम पश्चिम -१, साउन ।

आज देशैभर साउने (कर्कट) संक्रान्ति पर्व मनाइँदैछ । ज्योतिष शास्त्र अनुसार सौरमासका हिसाबले प्रत्येक वर्ष साउन १ गते स्नान, दान एवं आफन्त जम्मा गरेर यो पर्व मनाइन्छ ।

सूर्यले मिथुन राशिको भोग पूरा गरी कर्कट राशिमा प्रवेश गर्ने पहिलो दिमलाई साउने सङ्क्रान्तिका रुपमा मनाउने प्राचीन परम्परा छ । साउनदेखि नै सूर्य दक्षिण हुँदै हिँड्ने भएकाले आजैदेखि दक्षिणायन सुरु हुन्छ ।

विशेषगरी असार महिनाभर कृषि कर्ममा व्यस्त हुँदा हिलोमैलो लाग्ने र छालासम्बन्धी रोग ठीक गर्न साउने संक्रान्तिको दिन लुतो फाल्ने प्रचलन छ ।

महिलाले हरियो चुरा र कपडा लगाएर प्रकृतिसँग नजिक भएको देखाउने गर्छन् । साउन महिनालाई हरियो महिनाको रूपमा लिने गरिन्छ ।

यसैबीच साउने संक्रान्तिको अवसरमा कर्णाली प्रदेश सरकारले आज सार्वजनिक विदा दिएको छ । प्रदेशभरका सबै सरकारी कार्यालय तथा सार्वजनिक निकायमा बिदा दिइएको छ ।