रुकुम पश्चिम -३२, असार ।
रुकुम पश्चिमका गायक तथा कलाकार तिलक परियार सङ्गीत तथा नाट्य विधाको प्रादेशिक पुरस्कार २०८१ बाट सम्मानित भएका छन् । नेपाल सरकार संस्कृति, पर्यटन तथा नागरिक उडयन मन्त्रालयलयबाट बुधवार ५० हजार नगद पुरस्कार सहित सम्मानित भएका हुन् ।
मन्त्रालयले प्रदान गर्ने चारवटा विधा मध्ये सङ्गीत तथा नाट्य विधाको कर्णाली प्रादेशिक पुरस्कारबाट परियार सम्मानित भए । सो मन्त्रालयले असार १९ गते राष्ट्रिय तथा प्रादेशिक प्रतिभा पुरस्कार पाउने सम्मानित स्रष्टाको नाम सार्वजनिक गरेको थियो । सोही अनुसार आज आयोजित एक औपचारिक समारोहका बिच माननीय मन्त्री बद्री प्रसाद पाण्डेको उपस्थितिमा ३२ जना स्रष्टालाई सम्मान गरिएको हो ।
गायक तथा कलाकार परियार सानीभेरी गाउँपालिका वडानम्बर -३, का स्थायी बासिन्दा हुन् । लामो समयदेखि काठमाडौँमा रहेर गीत सङ्गीत क्षेत्रमा क्रियाशिल परियार सहित चारवटा विधामा ३२ जना स्रष्टाहरूलाई राष्ट्रिय तथा प्रादेशिक पुरस्कार, २०८१ बाट सम्मान गरिएको बताइएको छ ।
संस्कृति, पर्यटन तथा नागरिक उडयन मन्त्रालयले राष्ट्रिय तथा प्रादेशिक प्रतिभा पुरस्कार कार्यविधि, २०७४ बमोजिम भाषा एवं साहित्य, संस्कृति विधा, सङ्गीत तथा नाट्य विधा र ललितकला विधामा प्रत्येक वर्ष विभिन्न स्रष्टालाई सम्मान गर्दै आइरहेको छ ।
