रुकुम पश्चिम -२१, असार ।
सर्जिकल आँखा उपचार केन्द्र रुकुम पश्चिमको निःशुल्क आँखा स्वास्थ्य शिविरमा ९४ जनाले सेवा लिएका छन् । शुक्रबार सञ्चालन गरिएको एकदिने शिविरमा फेको प्रविधिबाट मोतिबिन्दुको सफल शल्यक्रिया र आँखा चेक जाँच गरिएको हो ।
सर्जिकल आँखा उपचार केन्द्र रुकुम पश्चिमका डाक्टर धन बहादुर केसीका अनुसार ९४ जनाको आँखा परीक्षण गरिएकोमा ४० जनाको अप्रेसन र ५४ जनाको चेकजाँच गरिएको छ ।
४० जनाको फेको प्रविधिबाट मोतिबिन्दुको सफल शल्यक्रिया गरिएको केसीले बताए । सो शिविरमा ल्याब सेवा समेत प्रदान गरिएको बताइएको छ । शिविरमा सहायक प्राध्यापक तथा जलविन्दु विशेषज्ञ डा. रञ्जित कुमार शाहको नेतृत्वमा चिकित्सक टोली संलग्न थियो ।
एनएबिपी आइ केयर नर्वेको आर्थिक सहयोगमा सञ्चालित शिविरमा राप्ती आँखा अस्पताल दाङले प्राविधिक सहयोग गरेको जनाइएको छ ।
रुकुम पश्चिम लगायत रुकुम पूर्व र सल्यानबाट आएका आँखाका बिरामीलाई यो शिविरले आँखाको उपचारमा ठूलो राहत पुगेको सेवाग्राहीले बताएका छन् ।
