रुकुम पश्चिम -१५, असार ।

नेपाल जनजागरण मञ्चले फास्टेनएक्सन स्विजरल्याण्डको साझेदारीमा सञ्चालन गरेको “सामुदायिक खाद्य सुरक्षा तथा सशक्तिकरण परियोजना” को समापन तथा हस्तान्तरण कार्यक्रम सम्पन्न गरेको छ । आठविसकोट नगरपालिकाको सभा हलमा नगर प्रमुख रवि केसीको प्रमुख आतिथ्यता र नेपाल जनजागरण मञ्चका अध्यक्ष टेक बहादुर कुसारीको अध्यक्षतामा कार्यक्रम सम्पन्न गरिएको हो ।

परियोजना संयोजक समिट रिजालले परियोजनाको उपलब्धि तथा गतिविधिबारे विस्तृत प्रस्तुति दिई सरोकारवालाहरूसँग अन्तरक्रिया गरेपश्चात संस्थाका अध्यक्ष कुसारीले परियोजनाको सम्पूर्ण विवरण समेटिएको हस्तान्तरण पुस्तिका औपचारिक रूपमा नगर प्रमुख केसीलाई प्रदान गरेका छन् । नगर प्रमुख केसीले परियोजनाले नगरपालिकाको कृषि क्षेत्रमा पुर्याएको योगदानप्रति आभार प्रकट गर्दै यस्ता प्रयासहरूलाई स्थानीय सरकारबाट निरन्तरता दिइने प्रतिबद्धता जनाए ।

वडानम्बर १ र २ का अध्यक्षहरूले परियोजनाको प्रभावकारी कार्यप्रति सन्तोष व्यक्त गर्दै भविष्यमा पनि यस्तै खालका परियोजनामा सहकार्य गर्न इच्छुक रहेको र वडाले यस परियोजनाका उपलब्धि तथा क्रियाकलापहरुलाई निरन्तरता दिने प्रतिबद्धता व्यक्त गरे ।

परियोजनाले अन्नबाली, तरकारी, फलफूल तथा डाले घाँसमा आधारित वातावरणमैत्री पर्यावरणीय कृषि अभ्यासलाई प्रवर्द्धन गर्दै खाद्य तथा पोषण सुरक्षामा महत्वपूर्ण योगदान पुर्याएको छ । परियोजनाबाट प्रत्यक्ष रुपमा ५ सय ६६ घरधुरी लाभान्वित भएका छन् ।

परियोजनाको कुल बजेट १ करोड ६४ लाख १७ हजार ९ सय ९३ रहेको थियो । परियोजनाको अवधि जनवरी २०२२ देखि जुन २०२५ सम्म रहेको थियो ।

परियोजना समापन तथा हस्तान्तरण कार्यक्रममा स्थानीय सरकारका प्रमुख तथा प्रतिनिधिहरु, क्रियाशील राजनैतिक दलका प्रतिनिधि, लाभग्राही, गैर सरकारी संघ संस्थाका प्रतिनिधि र अन्य सरोकारवालाहरुको सहभागिता रहेको बताइएको छ ।