रुकुम पश्चिम -११, असार ।
रुकुम पश्चिमको आठविसकोट नगरपालिकाले १८ औँ नगर सभाबाट १५ जनालाई सम्मान तथा पुरस्कृत गरेको छ । आर्थिक वर्ष ८१/८२ को कार्यसम्पादन मुल्याङ्कनका आधारमा विभिन्न विधाका १५ जनालाई प्रमाण पत्र, दोसल्ला र नगद पुरस्कारले सम्मान गरेको हो ।
नगरपालिकाले उत्कृष्ट किसानदेखि जनप्रतिनिधि, कर्मचारी, शिक्षक, खेलाडी सञ्चारकर्मी र कार्यालय सहयोगीलाई सम्मान सहित पुरस्कृत गरिएको बताएको छ । पालिकाले जनप्रतिनिधितर्फ वडानम्बर -१४, का अध्यक्ष हुकुम बहादुर पुन, कार्यपालिका सदस्य कष्णा घर्ति र वडा सदस्य भक्त बहादुर वुढालाई सम्मान गरेको छ ।
त्यस्तै कर्मचारीतर्फ नरिन्दर कुमार, स्वास्थ्य कर्मचारी विमला थापा पुनलाई सम्मान गरिएको छ । प्रधानाध्यापक मान बहादुर चन्द र शिक्षक नविन शाहीलाई पनि सम्मान गरिएको छ ।
उत्कृष्ट खेलकुद प्रशिक्षक नरेश पुन, उत्कृष्ट खेलाडी सुशान्त नेपाली, कृषक दिपक सार्की, उत्कृष्ट मेयर कृषक पुरुस्कार दल बहादुर वुढा, तरकारी खेती भरत मल्ल, किवी खेती अर्जुन यरी पनि सम्मानित भएका छन् ।
त्यसैगरी सञ्चारकर्मी देव कुमार ओली र कार्यालय सहयोगी धन बहादुर बिष्टलाई अनि सम्मान गरिएको छ ।
दुई दिनसम्म चलेको नगरपालिकाको १८ औँ नगरसभा आर्थिक वर्ष २०८२/८३ को नीति तथा कार्यक्रम सहित ७६ करोड ३८ लाख ६९ हजारको बजेट पारित गरेको छ ।
नगरपालिकाको बजेट नीति तथा कार्यक्रमले भूकम्प पछिको पुनःनिर्माणलाई पहिलो प्राथमिकतामा राख्दै कृषि, पशुपालन, शिक्षा, स्वास्थ्य, रोजगारलाई समेत प्राथमिकतामा राखेको छ ।
