रुकुम पश्चिम -१८, जेठ ।
कर्णाली प्रदेशकै ठुलो भलिबल प्रतियोगिता रुकुम कप भलिबलको तेस्रो संस्करण आजबाट सुरु हुँदै छ । रुकुम पश्चिम भलिबल प्रशिक्षण केन्द्रको आयोजनामा हरेक वर्ष हुने प्रतियोगिताको तेस्रो संस्करण आजबाट जिल्ला सदरमुकाम मुसिकोट खलङ्गाको बराहटाकुरामा सुरु हुन लागेको हो ।
प्रतियोगिताको तयारी पूरा भएको आयोजक रुकुम पश्चिम भलिबल प्रशिक्षण केन्द्रका अध्यक्ष तेज बुढाले जानकारी दिए । उनका अनुसार प्रतियोगिताको आज दिउँसो २ बजे मुसिकोट नगरपालिकाका प्रमुख महेन्द्र केसीले उद्घाटन गर्ने कार्यक्रम रहेको छ ।
प्रतियोगिताको महिला तथा पुरुष दुवै तर्फ राष्ट्रिय तथा अन्तर्राष्ट्रिय खेलाडीहरू सहभागी हुने आयोजकले जनाएको छ ।
प्रतियोगिता पुरुष तर्फ खुला पालिका स्तरीय र महिला तर्फ खुला हुने आयोजकले जनाएको छ । पुरुष भलिबलको विजेताले ५ लाख ११ हजार नगद पुरस्कार प्राप्त गर्ने छ ।
उप विजेताले २ लाख ९१ हजार पाउँदा तेस्रोले १ लाख ५१ हजार र सान्त्वना हुने टिमले १ लाख ११ हजार पुरस्कार पाउने अध्यक्ष बुढाले बताए । कप, मेडल र प्रमाणपत्र समेत रहने छ ।
विधागत तर्फ व्यक्तिगत रूपमा पनि खेलाडी पुरस्कृत गरिने आयोजकको भनाइ छ । सर्वोत्कृष्ट खेलाडीलाई १० हजार नगद सहित पुरस्कृत गरिने छ भने वेस्ट स्पाइकर, वेस्ट सेटर, वेस्ट ब्लकर, वेस्ट डिफेन्डर, वेस्ट सर्भर, इमर्जिङ प्लेयर र वेस्ट कोचलाई समान ५ हजार पुरस्कार प्रदान गरिने छ ।
पुरुष तर्फ नेपाल भरीका पालिकाले सहभागिता जनाउन पाउने छन् भने अनिवार्य रूपमा तीन जना खेलाडी पालिका बाहिरका राख्न पाइनेछ । त्यसबाहेक लिबेराे पनि पालिका बाहिरको राख्न पाइने छ । पालिका बाहिरका खेलाडी राष्ट्रिय तथा अन्तर्राष्ट्रिय हुन सक्नेछन् ।
त्यस्तै महिला तर्फको विजेताले १ लाख नगद पुरस्कार प्राप्त गर्ने छ । उप विजेताले ७५ हजार पुरस्कार पाउँदा तेस्रो हुनेले ५० हजार सान्त्वना टिमले २५ हजार पुरस्कार प्राप्त गर्ने आयोजकले जनाएको छ । कप, मेडल र प्रमाणपत्रको समेत व्यवस्था गरिएको छ ।
विधागतमा महिला तर्फ पनि व्यक्तिगत रूपमा पनि खेलाडी पुरस्कृत गरिने छ । सर्वोत्कृष्ट खेलाडीलाई ५ हजार तथा वेस्ट स्पाइकर, वेस्ट सेटर, वेस्ट ब्लकर, वेस्ट डिफेन्डर, वेस्ट सर्भर, इमर्जिङ प्लेयर र वेस्ट कोचलाई समान ३ हजार पुरस्कार प्रदान गरिने आयोजकले जनाएको छ ।
यो प्रतियोगिता कर्णाली प्रदेशकै ठुलो रहेको छ । प्रतियोगिताका लागि करिब ३१ लाख खर्च लाग्ने अनुमान गरिएको छ । जिल्लाको भलिबल विकास गरी रुकुमलाई खेलकुदको हबका रूपमा विकास गर्नुका साथै खेल पर्यटनको विकासका लागि रुकुम कप भलिबलको परिकल्पना गरिएको बताइएको छ ।
प्रतियोगिताको मिडिया पार्टनरमा कखरा डट कम रहेको छ । प्रतियोगिताका सबै खेल कखरा डट कमको युट्युब, फेसबुक र राजा क्रिएसन घरबाट हेर्न सकिनेछ ।
