रुकुम पश्चिम -७, जेठ ।
रुकुम पश्चिमको मुसिकोटमा आज कर्णालीमा सिस्नुपानी हास्यव्यङ्ग्य यात्रा सम्पन्न भएको छ । सिस्नुपानी नेपाल र ट्रान्सपरेन्सी इन्टरनेसनलको सहकार्यमा हास्यव्यङ्ग्य यात्रा २०८२ सम्पन्न भएको हो ।
सुशासन प्रवर्द्धनका लागि पहिलोपटक कर्णालीमा सञ्चालन गरिएको हास्यव्यङ्ग्य यात्रा चर्चित कलाकाहरुको प्रस्तुतिमा सम्पन्न गरिएको छ ।
सहिद प्रतिष्ठान हल सेरीगाउँमा आयोजना गरिएको कार्यक्रममा हास्यव्यङ्ग्य क्षेत्रका चर्चित साहित्यकार तथा कलाकारहरू अर्जुन पराजुली, चक्र दवाडी, सुवोध गौतम, शिशिर योगी लगायतले आफ्नो प्रस्तुति राखेका हुन् ।
सो हास्यव्यङ्ग्यको प्रस्तुति मार्फत सामाजिक, राजनीतिक र सांस्कृतिक विषयमा जनचेतना फैलाउने तथा भ्रष्टाचार उन्मूलन र सुशासन स्थापनाको लागि सरोकारवालाहरूलाई झकझकाउने सन्देश अभिव्यक्त गरिएका थिए ।
यस कार्यक्रमलाई सफल बनाउन मुसिकोट नगरपालिकाको संयोजन तथा जिल्ला प्रशासन कार्यालय रुकुम पश्चिम र राप्ती साहित्य परिषद्ले सहजीकरण गरे । निःशुल्क रुपमा हेर्न पाइने व्यवस्था गरिएको यस हास्यव्यङ्ग्य यात्रामा मुसिकोट खलङ्गा लगायतका सर्वसाधारण र विद्यार्थीको सहभागिता रहेको थियो ।
रुकुम पश्चिमबाट सुरु गरिएको कर्णालीमा सिस्नुपानी हास्यव्यङ्ग्य यात्रा जाजरकोट, दैलेख, कालीकोट, जुम्ला र मुगुमा पनि प्रस्तुत गरिने बताइएको छ ।
