रुकुम पश्चिम -५, वैशाख । 

विद्यार्थीको भविष्य निर्धारण गर्ने शैक्षिक थलो नै विद्यालय हो । हरेक वर्षको शैक्षिक सत्र समापन सङ्गै अर्को नयाँ शैक्षिक सत्रको सुरुवातले विद्यार्थीमा थप उत्साह र जाँगर थपिदिन्छ । किनकि पुरानो कक्षा पार गरेर माथिल्लो तहको नयाँ कक्षामा पढ्न पाउनु विद्यार्थीको अर्को सपना हो ।

तर यतिबेला देशैभरका शिक्षकहरूको आन्दोलन काठमाडौँमा जारी छ । आन्दोलनको आज सत्रौँ दिन पूरा भइसकेको छ । शिक्षकहरूले सरकारसँग शिक्षकका मुद्दालाई स्थापित हुने गरी नयाँ शिक्षा ऐनको माग गरिरहेका छन् । सो मागसँगै उनीहरूले लगातारको सडक आन्दोलनलाई अझै सशक्त बनाउँदै छन् । तर अहिलेसम्म शिक्षक र सरकारबीचको वार्ता र सम्झौता सफल हुन सकेको छैन । आन्दोलन चर्किरहेको छ । सरकारले त्यसतर्फ चासो देखाएको छैन ।

यसरी काठमाडौँ केन्द्रित शिक्षक आन्दोलनले अहिले देशैभरका सामुदायिक विद्यालयको भर्ना अभियान भने ठप्प बनेको छ । भर्नाको मुखैमा विद्यालय बन्द हुनुले विद्यार्थीमा मनोवैज्ञानिक असर त परेको छ नै उनीहरूको भविष्यमा पनि खेलबाड भएको अभिभावक बताउँछन् ।

प्रत्येक वर्ष नयाँ शैक्षिक सत्रको वैशाख १५ गते भित्रै सबै सामुदायिक विद्यालयले अनिवार्य भर्ना गरिसकेको हुनुपर्छ । तर भर्ना अभियानको पहिलो साताको पाँचौँ दिनसम्म आइपुग्दा यता रुकुम पश्चिमका सामुदायिक विद्यालयका गेटमा ताला लागेको पाइन्छ । विद्यालय क्षेत्र सुनसान बन्दै गएका छन् । शिक्षक, विद्यार्थी र अभिभावकको चहलपहल देखिँदैन ।

जिल्ला स्थित केही प्रतिष्ठित सामुदायिक विद्यालयले त शिक्षक आन्दोलनलाई समर्थन गर्दै आफ्नो आधिकारिक सूचना सार्वजनिक गरिसकेका छन् । अर्कोतिर स्थानीय तहले नै शिक्षक आन्दोलनलाई सघाउने गरी सरकारलाई नै पत्र लेखेका छन् । यसकारण पनि जिल्लाका अन्य सामुदायिक विद्यालयले हाल भर्ना अभियान रोकेका छन् ।

यता सामुदायिक विद्यालयको भर्ना अभियान रोकिँदा निजी विद्यालयमा भने विद्यार्थी भर्ना अभियानको चहलपहल बढ्दै गएको छ । जिल्लाका विभिन्न ठाउँमा सञ्चालित निजी विद्यालयले वैशाख २ गते देखि नै धमामधम भर्ना लिईरहेका छन् । विद्यार्थी र उनीहरूका अभिभावकले पनि समयमै आफ्ना बालबच्चाको भर्ना गरिरहेका छन् ।

यसरी सामुदायिक र निजी विद्यालयको भर्ना अभियानको फरकपनाले हाल सामुदायिक र निजी विद्यालयमा अध्ययन गर्ने बालबालिकाको मनोविज्ञानमा फरक-फरक बुझाइ पर्न गएको छ । अर्थात् निजी विद्यालयमा अध्ययन गर्ने विद्यार्थीमा नयाँ उत्साह र जाँगर देखिँदा सामुदायिक विद्यालयमा अध्ययन गर्ने विद्यार्थीमा निरासा छाउने शैक्षिक क्षेत्रका विज्ञहरु बताउँछन् ।