रुकुम पश्चिम -२८, चैत ।

रुकुम पश्चिमको चौरजहारी नगरपालिकाले आयोजना गरेको सार्वजनिक सुनुवाइ कार्यक्रम सम्पन्न भएको छ । हिमालय मावि खोलागाउँ र नगरपालिकाको कार्यालयमा आयोजना गरिएको सार्वजनिक सुनुवाइ कार्यक्रम आज सम्पन्न भएको हो ।

निमित्त प्रमुख प्रशासकीय अधिकृत शेर प्रसाद ढकालका अनुसार चैत २६ गते नगरपालिकाको कार्यालय र बिहीबार खोलागाउँमा सार्वजनिक सुनुवाइ सम्पन्न गरिएको छ । नगर कार्यपालिकाको कार्यालय र सो अन्तर्गका निकायबाट सम्पादित कार्यहरू, सेवा प्रवाह लगायतका सन्दर्भमा सार्वजनिक सुनुवाइ गरिएको बताइएको छ ।

त्यस्तै कार्यक्रममा सम्पादित कार्य सहित नगरपालिकाका असल अभ्यास, चुनौती र सम्भावनाका विषयमा पनि प्रस्तुतिकरण गरिएको प्रशासकीय अधिकृत ढकालको भनाइ छ ।

यसैगरी आर्थिक विकास, सामाजिक विकास, पूर्वाधार विकास, वन वातावरण तथा विपद व्यवस्थापन र संस्थागत विकास तथा सुशासनका क्षेत्रमा चालु आर्थिक वर्षमा सम्पादित कार्यकाे प्रस्तुतिकरण तथा राजश्व सङ्कलनको अवस्था र आयव्यय समेत सार्वजनिक गरिएको छ ।

सार्वजनिक सुनुवाइ कार्यक्रमबाट सेवाग्राहीको गुनासो, जिज्ञासा, सल्लाह, सुझाव, प्रशंसा र प्रतिक्रिया सङ्कलन गरी कार्यान्वयन गर्ने प्रतिबद्धता नगरपालिकाले गरेको छ ।

कार्यक्रममा जनप्रतिनिधि, राजनीतिक दलका स्थानीय प्रमुख/प्रतिनिधि, सरकारी र गैरसरकारी संघसंस्थाका प्रमुख, शिक्षक, कर्मचारी, विद्यार्थी, व्यापारी, वुद्धिजीवि, नगर प्रहरी, नेपाल प्रहरी, पत्रकार लगायत सेवाग्राहीको उपस्थिति रहेको नगरपालिकाले बताएको छ ।