रुकुम पश्चिम -२१, चैत ।
रुकुम पश्चिमको सल्ले स्थित आँखा उपचार केन्द्रमा ६ हजार बढी बिरामीले आँखा र कानको उपचार गराएका छन् । चालु आर्थिक वर्षको साउनदेखि हालसम्म ६ हजार बढीले आँखा र कानको चेकजाँच गराएका हुन् ।
आँखा उपचार केन्द्रका इन्चार्ज धन बहादुर केसीका अनुसार नौ महिनाको अवधिमा चार हजार नौ सय १८ जनाले आँखाको उपचार गराएका छन् । जस अन्तर्गत चस्मा जाँच एक हजार नौ सय ९९ जना, मोतिबिन्दु अपरेसन एक सय ५२ जना, सामान्य शल्यक्रिया ४२ जना र चस्मा लगाएर निको भएको सङ्ख्या सातसय २३ जना रहेको छ ।
यहाको आँखा उपचार केन्द्रमा एक हजार एकसय ६४ जनाले कानको उपचार समेत गराएका छन् । त्यस्तै आँखा उपचार केन्द्रले ५० प्रतिशत छुटमा पाँचवटा अपरेसन शिविर सञ्चालन गरिसकेको बताएको छ ।
यसैगरी उपचार केन्द्रले यस आर्थिक वर्षमा समुदाय स्तरमा पुगेर ६ वटा नर्मल चेकजाँचको शिविर सञ्चालन गरेको छ । सो शिविरबाट एक हजार एकसय ५६ जनाले सेवा लिएका छन् ।
आँखा उपचार केन्द्रले आर्थिक अवस्था कमजोर भएकालाई केही दातृ निकायको सहयोग र दानपेटिकामा संकलन भएको रकमले निशुल्क सेवा समेत दिने गरेको छ ।
गत आर्थिक वर्ष भन्दा यस आर्थिक वर्षमा दोब्बरभन्दा धेरैले आँखा तथा कानको उपचार गराएका छन् । यस उपचार केन्द्रमा दैनिक २० देखि २५ जनाको आँखा र कानको चेक जाँच हुने गरेको आँखा उपचार केन्द्रले बताएको छ ।
यहाँको उपचार केन्द्रमा रुकुम पश्चिम लगायत छिमेकी जिल्ला रुकुम पूर्व, सल्यान, जाजरकोट, रोल्पा र डोल्पाका नागरिकले सेवा लिने गरेका छन् ।
