रुकुम पश्चिम -१८, चैत ।

मुस्लिम समुदायले आज ईद उल फित्र ईद मनाउँदै छन् । इस्लाम धर्मावलम्बीहरूका लागि सबैभन्दा पवित्र महिना रमजानको समापनसँगै ईद मनाइँदैछ ।

हिजरी पात्रो अनुसार रमजानको अन्त्यमा मनाइने यो पर्व प्रार्थना, भेटघाट, नयाँ लुगा र मिठाइ आदान-प्रदान गरेर उत्सवको रूपमा मनाउने गरिन्छ ।

आफूभन्दा सानालाई आशीर्वाद दिँदै आशीर्वाद लिन आउने आफन्तलाई सेवई र खजुर लगायत मीठा खानेकुरा खान दिने चलन छ । खुशीपूर्वक दान गरेर दीनदुःखीलाई बाँडिने भएकाले यो पर्वलाई ईद-उल-फित्र भनिएको हो ।

ईदमा अल्लाहका नाममा विशेष नमाज पढ्ने परम्परा छ । ईदका दिन मुख्य धार्मिक ग्रन्थ कुरान मोल्वी (धर्मगुरु) ले वाचन गरेर सदविचार र सत्कर्ममा रहन प्रोत्साहन गरिन्छ ।

यसैबीच सरकारले आज इस्लाम धर्मावलम्बीहरुको पर्व ईदका अवसरमा देशैभर सार्वजनिक विदा दिएको छ ।