रुकुम पश्चिम -१७, चैत ।
आठविसकोट नगरपालिकामा रहेको नापी कार्यालयले डिजिटल बोर्डको घटनाका विषयलाई लिएर गम्भीर ध्यानाकर्षण गराएको छ । कार्यालयको बोर्ड ह्याक भई अनावश्यक शब्द प्रवाह भएकोमा एक विज्ञप्ति मार्फत गम्भीर ध्यानाकर्षण गराएको हो ।
कार्यालय प्रमुख मानबहादुर आग्रीका अनुसार डिजिटल बोर्डमा कार्यालयको नाम नै हटाएर गलत शब्द प्रयोग भएकोमा ध्यानाकर्षण गरिएको छ । यस्तो गलत विषयले सेवाग्राही र सर्वसाधारणमा पर्न गएको असुविधा र अन्योलप्रति कार्यालयले क्षमा मागेको छ ।
साथै आगामी दिनमा यस्ता अवान्छनीय घटनाप्रति नापी कार्यालय सचेत रहने बताईएको छ ।
आज बिहान मात्रै नापी कार्यालयको डिजिटल बोर्डको स्लाइडमा ‘आई लभ यू प्रमिला रियल्ली लभ यू’ देखिएको थियो । उक्त बोर्डमा देखिएको गलत सन्देशको तस्बिर पत्रकार सुनिल महराले कैद गरेर आफ्नो फेसबुक मार्फत सार्वजनिक गरेका थिए ।
सोही विषयमा कार्यालयले ध्यानाकर्षण गराउँदै आधिकारिक धारणा सार्वजनिक गरेको हो ।
