रुकुम पश्चिम -१६, चैत ।

रुकुम पश्चिमको बाँफिकोट गाउँपालिकामा सञ्चालन गरिएको पशु स्वास्थ्य शिविरमा सात हजार बढी पशुपन्छीको उपचार गरिएको छ । शुक्रबार वडानम्बर -२, को पिपलमा विज्ञ सहित सञ्चालन गरिएको शिविरमा सात हजार एकसय ३२ पशुपन्छीको उपचार गरिएको हो ।

पशु अस्पताल तथा पशु सेवा कार्यालयका पशु सेवा प्राविधिक रिमबहादुर खड्काका अनुसार एकदिने शिविरमा गाई, गोरु, भैंसी, राँगा, भेडा, बाख्रा, कुकुर र कुखुराको उपचार गरिएको छ । जसअन्तर्गत पाँच सय १७ वटा गाई गोरु, तीनसय ५४ वटा राँगा भैंसी, दुई हजार ७ सय ८५ वटा भेडा बाख्रा, तीन हजार चारसय २५ कुखुरा र ५१ वटा कुकुरको उपचार गरिएको छ ।

शिविरमा नौवटा बोका र चारवटा बहर गोरुको बन्ध्याकरण गरिएको बताइएको छ । वडा नम्बर -१ र २ लाई लक्षित गरी सञ्चालन गरिएको पशु स्वास्थ्य शिविरमा पुगेर एकसय ९८ घरपरिवारले पशुपन्छीको उपचार गराएका हुन् ।

शिविरमा पशु अस्पताल तथा पशुसेवा कार्यालय र गाउँपालिकाको पशुसेवा कार्यालयको प्राविधिक टोली र पशुविज्ञ डा. दीपक ओली र रिया फुयालको सहभागी रहेको बताईएको छ ।

शिविर उद्घाटनमा वडानम्बर -२, का वडाध्यक्ष प्रकाश खत्रीको प्रमुख आतिथ्यता रहेको थियो ।