रुकुम पश्चिम -१३, चैत ।

रुकुम पश्चिमको मुसिकोटमा आज यौन तथा प्रजनन स्वास्थ्य अधिकार र बालविवाहका सवालमा सरोकारवालासँग छलफल गरिएको छ । समता फाउन्डेसन नेपालले आयोजना गरेको कार्यक्रममा जिल्ला स्थित सरोकारवाला निकायहरूको उपस्थितिमा बालविवाहका सवालमा छलफल गरिएको हो ।

समता फाउन्डेसनको कर्णाली चेतना अन्तर्गत दुई वर्षे परियोजनाका सन्दर्भमा रुकुम पश्चिमको यौन तथा प्रजनन स्वास्थ्य अधिकार र बालविवाह लगायत विभिन्न विषयमा रहेर छलफल गरिएको छ । कार्यक्रममा सरोकारवाला निकायले जिल्लामा बालविवाहको अवस्था एवं यस सम्बन्धी गरिएका क्रियाकलाप र सवालहरूलाई छलफलका रूपमा प्रस्तुत गरेका थिए ।

सोही अनुरूप कार्यक्रममा उठेका विषयवस्तु समता फाउन्डेसनले महत्त्वपूर्ण सुझावका रूपमा ग्रहण गर्ने बताएको छ । त्यसका लागि सबै निकाय सँग समन्वय र सहकार्य तथा हातेमालो गर्दै यस परियोजनालाई सफल बनाइने समता फाउन्डेसनका अध्यक्ष डाक्टर मदन प्रकाश परियारले बताए ।

परियोजनाले कर्णालीका १० वटै जिल्लामा यौन तथा प्रजनन स्वास्थ्य अधिकार र बालविवाहको अवस्थालाई न्यूनीकरण गर्ने अभियान राखेको छ । जसबाट स्थानीय तहमा बालविवाह उन्मुलन तथा सुरक्षित महिनावारी शिक्षा र स्वास्थ्य सेवाहरूमा पहुँच बढाउन परियोजनाले नीति निर्माण र कार्यान्वयनमा नीति पैरवी गर्ने बताइएको छ ।

त्यस्तै स्थानीय तहमा बालविवाहको दर तीव्र रुपमा घटाउने, स्थानीय तहमा महिनावारी सेवा केन्द्रको विकास गर्ने र स्थानीय सरकारहरूको जवाफदेहिता सुदृढका लागि दलित किशोरीहरूले सम्मानजनक जीवनयापन गर्ने वातावरण सिर्जना गर्ने लक्ष्य राखेको छ ।

बालविवाह हुने जिल्लामा रुकुम पश्चिम कर्णालीका १० जिल्लामध्ये दोस्रो स्थानमा रहेको छ ।