रुकुम पश्चिम -७, चैत ।
रुकुम पश्चिमको चौरजहारी नगरपालिकाले एआई च्याटबोट प्रयोगमा ल्याउन लागेको छ । नगरपालिकाको कार्यालयसँग सम्बन्धित जानकारी सहज रूपमा प्रदान गर्न एआई च्याटबोट प्रयोगमा ल्याउन लागेको हो ।
नगरपालिकाका निमित्त प्रमुख प्रशासकीय अधिकृत शेर प्रसाद ढकालले यसको प्रयोग र प्रारम्भमा देखिएका त्रुटिहरू पहिचान गर्न बुधबार कर्मचारीहरूसँग अभिमुखीकरण कार्यक्रम गरिएको बताए । उनले प्रयोगमा ल्याउन लागिएको एआई च्याटबोट प्रविधिमा आधारित कम्प्युटर प्रोग्राम रहेकाले यसले नागरिकसँग कुराकानी गर्नेछ ।
यसको प्रयोग मार्फत सेवाग्राहीले लेखेर वा बोलेर दुबै माध्यमबाट काम गर्न सक्नेछन् । त्यस्तै घरबाटै चाहिएको जानकारी प्राप्त गरी आवश्यक तयारी गर्न सहज हुने बताइएको छ । यसबाट सेवाप्रवाहको सरलीकरणमा नवीनतम सूचना प्रविधिको उपयोग हुने विश्वास गरिएको छ ।
एआई च्याटबोटले नगरपालिका कार्यालयबाट प्राप्त गर्न सकिने सेवा, आवश्यक कागजात, प्रक्रिया, दस्तुर, प्रतिवेदन, सम्पर्क नम्बर लगायतका आवश्यक जानकारी सहज रूपमा उपलब्ध गराउने छ ।
अर्थात् सेवाग्राही वा कुनै पनि व्यक्तिले चौरजहारी नगरपालिका कार्यालयसँग सम्बन्धित रहेर खोजेको जानकारी तथ्यमूलक रूपमा नै एआई च्याटबोटले उपलब्ध गराउने नगरपालिकाले बताएको छ ।
नगरपालिकाले एआई च्याटबोट अबको एक महीना भित्रै सञ्चालनमा ल्याउने जानकारी दिएको छ ।
