रुकुम पश्चिम -७, फागुन ।

आज देशभर ७५औँ ‘राष्ट्रिय प्रजातन्त्र दिवस’ विभिन्न  कार्यक्रम आयोजना गरी मनाइँदै छ । नेपालको इतिहासमा जहानियाँ राणा शासनको अन्त्य भई प्रजातन्त्र स्थापना भएको गौरवपूर्ण र अविस्मरणीय दिनका रूपमा फागुन ७ गतेलाई दिवसको रुपमा मनाइन्छ ।

२००७ साल फागुन ७ गते प्रजातन्त्र स्थापना भएको दिन आज रुकुम पश्चिममा पनि विविध कार्यकम आयोजना गरी यो दिवस मनाइँदै छ ।

प्रजातन्त्र दिवसका अवसरमा मूल समारोह समितिद्वारा काठमाडौंको सैनिक मञ्च टुँडिखेलमा पनि राष्ट्रपति रामचन्द्र पौडेल सहभागी हुने कार्यक्रम रहेको छ ।

आजको प्रजातन्त्र दिवस समारोहलाई प्रधानमन्त्री केपी शर्मा ओलीले पनि सम्बोधन गर्ने कार्यक्रम छ । सरकारले प्रजातन्त्र दिवसका अवसरमा आज सार्वजनिक बिदा दिएको छ ।