रुकुम पश्चिम ६, फागुन ।
रुकुम पश्चिमका करिब १६ हजार भूकम्प लाभग्राहीले दोस्रो चरणको किस्ता पाउने भएका छन् । अस्थायी आवास निर्माणका लागि १५ हजार ८ सय ८१ लाभग्राहीले दोस्रो किस्ता पाउने भएका हुन् ।
जिल्ला प्रशासन कार्यालयका अनुसार दोस्रो किस्ता बापत ३९ करोड ७० लाख २५ हजार रुपैयाँ निकासा गरिएको छ । सो निकासा रकम जिल्ला विपद् जोखिम न्यूनीकरण तथा व्यवस्थापन कोषबाट सम्बन्धित स्थानीय तहहरूको स्थानीय विपद् जोखिम न्यूनीकरण तथा व्यवस्थापन कोषमा पठाइएको छ ।
जसअन्तर्गत चौरजहारी नगरपालिकाका तीन हजार ९ सय १२ लाभग्राहीका लागि ९ करोड ७८ लाख र आठविसकोट नगरपालिकाका ७ हजार तीनसय ८१ लाभग्राहीका लागि १८ करोड ४५ लाख २५ हजार रकम पठाइएको छ ।
त्यस्तै मुसिकोट नगरपालिकामा एक हजार ६ सय १० लाभग्राहीका लागि ४ करोड २५ लाख, त्रिवेणी गाउँपालिकामा तीन सय ३७ लाभग्राहीका लागि ८४ लाख २५ हजार र बाँफिकोट गाउँपालिकाका लागि २ हजार ६ सय ४१ लाभग्राहीका लागि ६ करोड ६० लाख २५ हजार रुपैयाँ निकासा गरिएको छ ।
रुकुम पश्चिममा अस्थायी आवास निर्माणका लागि जिल्लाभर ३४ हजार ९ सय ९७ लाभग्राही कायम भएका छन् । जसमध्ये पहिलो किस्ताबाट छुटेका २ हजार एक लाभग्राहीलाई दोस्रो किस्ता बापतको रकम निकासा भए पश्चात् बचत हुन आउने रकमलाई स्थानीय तहबाट सिफारिस भए बमोजिम लाभग्राही सङ्ख्याको आधारमा समानुपातिक रुपमा वितरण गरिने भएको छ ।
साथै अपुग रकम निकासाका लागि प्राधिकरण समक्ष पुनः अनुरोध गर्ने जिल्ला विपद् जोखिम न्यूनीकरण तथा व्यवस्थापन समितिले बताएको छ ।
