रुकुम पश्चिम -२, फागुन ।
हामी अहिले सूचना, समाचार र प्रविधिको शक्तिशाली विश्व बजारमा छौं । यही विश्वबजारको युग आज सूचना र प्रविधिमा निर्भर बन्दै गएको छ । उसोत आजको प्रविधियुक्त समाजलाई परिवर्तनको बाटोमा सूचना, मनोरञ्जन, समाचार र सञ्चारले नै जीवन जिउने शैलीमा अगाडि डोर्याउन थालेको छ । हिजोको परम्परागत सञ्चार प्रणाली आज विकसित र वैज्ञानिक सञ्चारको रूपमा रूपान्तरण हुँदै गएको छ ।
नेपालको सन्दर्भमा पत्रकारिताको इतिहासलाई नियालेर हेर्दा कुनै समय वा कालखण्डको परम्परागत सञ्चार प्रणाली आज संघीय लोकतान्त्रिक गणतन्त्रको डिजिटल सञ्चार युगमा आइपुगेको छ । नेपाली पत्रकारिताको इतिहास वि सं १९५५ बाट सुरु भएको एउटा साहित्यिक पत्रिका प्रकाशनलाई मानिन्छ । तर समय परिवर्तनसँगै पत्रकारिताको इतिहास चरणबद्ध रुपमा विकसित बन्दै आज न्यू मिडियाको संसारमा स्थापित हुँदैछ ।
जसकै फलस्वरूप आजको युगमा डिजिटल सञ्चार अन्तर्गत प्रभावकारी बन्दै गएको न्यू मिडियाले एकातर्फ पाठक र सामाजिक प्रयोगकर्तालाई छिटो छरितो सत्यतथ्य समाचार र सूचना प्रवाहको पहुँचमा पुर्याएको छ । अर्को तर्फ सामाजिक सञ्जाल प्रयोगकर्ताकै कारण डिजिटल सञ्चार माध्यमहरू संकटमा पर्न थालेका छन् । त्यस्तै कतिपय अवस्थामा अनलाइन मिडियाले प्रवाह गर्ने गलत सन्देशका कारण पत्रकारिताको नैतिकता र जिम्मेवारीमा चुनौती सहितको प्रश्न चिन्ह खडा गरिदिएको छ ।
यसको मतलब पत्रकारिता क्षेत्रमा मात्रै समस्या देखिएको हो भन्न खोजिएको होइन । आज हाम्रा सामाजिक मूल्यमान्यता, सांस्कृतिक चालचलन, रहनसहन, परिवेश लगायत हरेक क्षेत्रमा विचलनको अवस्था देखिन्छ । त्यस्तै सुशासन, र जवाफदेहितामा पारदर्शिता देखिँदैन । आर्थिक र राजनीतिक क्षेत्रमा पनि समस्या नै समस्या छ । अवसरवादी चिन्तन र व्यथितिले सीमा नाघेको देखिन्छ । हो यही बेला तमाम समस्याको समाधान गर्न सबै क्षेत्रमा अब सुधारको आवश्यकता देखिन्छ ।
त्यसैले सुधार न्युज अनलाइन मिडियाको उद्देश्य नै बिग्रिएकोलाई राम्रो बनाउनु अर्थात् सुधारेर लैजानु हो । हाम्रो यो यात्राले कुनै व्यक्ति, समाज र राष्ट्रलाई असल बनाउन वा सपार्न सन्तुलित समाचार र विचारले सही मार्गमा पुर्याउन मद्दत गर्नेछ ।
अर्थात् हाम्रो समाचार र हामीले उठान गर्ने विषयवस्तुले मुख्य रूपमा व्यक्तिगत, सामाजिक र प्राविधिक सुधारमा सहयोग पुर्याउनेछ । मतलब हामीले प्रवाह गर्ने समाचारबाट कुनै पनि व्यक्तिले आफ्नो व्यक्तिगत आनीबानी, ज्ञान तथा सीपमा सुधार गर्नेछ । त्यस्तै समाजका असल र खराब पक्षलाई सुधार गर्दै नयाँ र न्यायपूर्ण व्यवस्थामा सघाउ पुर्याउने छ । र अन्त्यमा कुनै पनि वस्तु, प्रणाली वा प्रक्रियालाई अझ प्रभावकारी एवं सशक्त बनाउन सुधार न्युज सधैँ एक कदम अगाडि बढ्ने छ । हाम्रो यस यात्रामा तपाईँको साथ निरन्तर रहिरहनेछ ।
सुधार न्युज ।
