रुकुम पश्चिम -१०, माघ ।
जाजरकोट भूकम्पबाट प्रभावित नलगाड नगरपालिकाका आठवटा वडामा एक घर एक धारा सहितको पानी पुगेको छ । बेलायत सरकारको आर्थिक सहयोग तथा युनिसेफ र सोसेक नेपालको सहजीकरणमा सात हजार बढी प्रभावितको घर घरमा व्यवस्थित धारा सहितको पानी पुगेको हो ।
भूकम्पपछि घरघरमा खानेपानीको धारा पुगेसँगै नलगाडका प्रभावित बासिन्दाले हिजोआज ढुक्कले पानी पिउन पाएको बताउँछन् । कुनैबेला भेरी नदी र खोलाको पानी बोकेरै दैनिकी चलाउँदाको दुःख अहिले एक घर एक धाराको पानीले भुलिदिएको ठूलाबगरकी शिला पुनको भनाई छ । खानेपानीको धारा सहित अहिले भूकम्प प्रभावितको घर घरमा शौचालय निर्माण पनि भएका छन् ।
युनिसेफ र सोसेक नेपालले नलगाडको आठवटा वडामा १४ वटा खानेपानी आपूर्ति योजना मार्फत ७ हजार ६ सय ९० लाभग्राहीका लागि सेवा पुर्याएको छ । त्यस्तै नौवटा विद्यालयमा स्वच्छता सुविधासहितको पानी आपूर्ति प्रणाली प्रदान गरिएको छ । यसबाट दुई हजार बढी विद्यार्थी प्रत्यक्ष रूपमा लाभान्वित भएको सोसेक नेपालका सामाजिक व्यवहार परिवर्तन तथा तालिम अधिकृत सृष्टि बाँठा मगरले बताइन् ।
भूकम्प प्रभावित क्षेत्र ठूला बगर र कल्पत गाउँ लगायत समुदाय स्तरमा एक हजार वटा सामुदायिक शौचालय तथा १७ वटा अपाङ्गता अनुकूल शौचालय निर्माण गरिएको छ । जसबाट समुदायका पाँच हजार बढी व्यक्तिहरू लाभान्वित भएका छन् ।
