रुकुम पश्चिम, -१० माघ ।
तत्कालीन सशस्त्र सङ्घर्षको बेला साविकको मुरु खारा पेउघा र रुँघा गाविसबाट ७० जना बढीले ज्यान गुमाउनु पर्यो । देश शान्ति प्रक्रियामा आए लगत्तै त्यसको केही वर्षपछि उनै सहीदहरुको सम्झनामा त्रिवेणी गाउँपालिका -६, झुल्नेटा डाँडामा सहिद स्मृति पार्क निर्माण गरियो । करिब १२ वर्ष अगाडि निर्माण गरिएको सो स्मृति पार्क एक दशक समयसम्म जीर्ण अवस्थामा रहिरह्यो । अहिले यही स्मृति पार्कलाई जनयुद्ध संग्रहालयको रूपमा व्यवस्थित गर्न लागिएको छ ।
अहिले सङ्ग्रहालयको कामले पूर्णता पाउने भएपछि यस क्षेत्रका स्थानीय बासिन्दाले यो कामलाई सकारात्मक रूपमा लिँदै खुसी व्यक्त गरेका छन् ।
यहाँको जनयुद्ध संग्रहालय निर्माणका लागि कर्णाली प्रदेश सरकार अन्तर्गत उद्योग पर्यटन वन तथा वातावरण मन्त्रालयको भ्याट बाहेक साढे ११ करोड लागत रहेको छ । गएको वैशाखदेखि संग्रहालय निर्माणको काम निरन्तर चलिरहेको छ । डिभिजन वन कार्यालय रुकुम पश्चिमका अनुसार हालसम्म उक्त संग्रहालयको ५२ प्रतिशत भौतिक प्रगति भएको छ ।
अहिले जनयुद्ध संग्रहालयको दुई तले घरसहित पाँचतलाको भ्यू टावर, बाल उद्यान, सडक बत्ति लगायत अन्य संरचना निर्माणको काम चलिरहेको छ । यसले पर्यटन क्षेत्रको विकास सँगै शहीदको सम्झनालाई अझै अमर अजर बनाउने काम भएको गाउँपालिका उपाध्यक्ष राज कुमारी रेउलेको भनाई छ ।
यस सङ्ग्रहालयमा विजय घलेसहित २४ जना शहीदहरूको शालिक राखिने भएको छ । जनयुद्ध संग्रहालय निर्माण ८३ असार अन्तिम सम्म सम्पन्न गरिने जम्भुदिप जेभीजी कन्ट्रक्सन प्रालीले बताएको छ ।
पर्यटकीय महत्व बोकेको झुल्नेटाबाट रुकुम पश्चिम सहित रुकुम पूर्व, सल्यान, रोल्पा, जाजरकोट लगायत सिस्ने, धौलागिरी र उच्च हिमाली श्रृंखलाको अवलोकन गर्न सकिन्छ ।
