चिना बराल 

सुर्खेत -१४, भदौ ।

लामो समयदेखि कम्युनिष्ट राजनीतिमा सक्रिय रहँदै आएकी रुकुम पश्चिमकी महिला नेतृ पार्वती विक ‘अनुयात्री’ नेपाली कम्युनिष्ट पार्टीमा प्रवेश गरेकी छन् ।

केही दिनअघि वीरेन्द्रनगर, सुर्खेतमा आयोजित अखिल नेपाल महिला संगठनको एकता भेलामा नेतृ विक पार्टीमा प्रवेश गरेकी हुन् ।

अखिल नेपाल महिला संगठनकी केन्द्रीय संयोजक दामा शर्मा प्रमुख अतिथि, सहसंयोजक मानव सिग्देल, केन्द्रीय संगठन विभाग प्रमुख रेणु दाहाल लगायत नेताहरूले विकलाई पार्टी प्रवेशमा स्वागत गरे ।

पार्टी प्रवेशपछि उनले नेपालका विभिन्न वामपन्थी शक्तिहरूबीच एकता र सहकार्य आवश्यक रहेको धारणा राखिन् । साना–साना कम्युनिष्ट पार्टी निर्माण गरेर विभाजित भइरहनुभन्दा जनताको पक्षमा एउटै बलियो वामपन्थी शक्ति निर्माण गर्नुपर्ने उनको जोड छ ।

उनले आफ्नो राजनीतिक यात्रालाई महिला अधिकार, सामाजिक न्याय, समानता र समावेशी लोकतन्त्रसँग जोड्दै आगामी दिनमा पनि जनताको पक्षमा काम गर्ने प्रतिबद्धता व्यक्त गरेकी छन् ।

२०५७ सालमा नेकपा माओवादीको सदस्य हुँदै २०५८ सालमा पूर्णकालीन कार्यकर्ताका रूपमा जिम्मेवारी सम्हालेकी उनले त्यसपछि संगठन तथा मिलिसियामा समेत काम गरेकी थिइन् । २०६० सालमा रुकुम पश्चिमको चौरजहारी क्षेत्रमा तत्कालीन शाही सेनाको घेरा तोडेर सुरक्षित रूपमा बाहिरिन सफल भएको उनको राजनीतिक जीवनको महत्वपूर्ण घटना रहेको छ ।

शान्ति प्रक्रियापछि २०६४ सालदेखि उनले महिला विभागको जिम्मेवारी सम्हाल्दै आएकी थिइन् । त्यसपछि २०७३ सालमा नेत्रविक्रम चन्द ‘विप्लव’ नेतृत्वको नेकपामा प्रवेश गरेकी विकले पार्टीका विभिन्न तहमा जिम्मेवारी निर्वाह गरिन् । जनसरकार सभामुख, पार्टी नगर इन्चार्ज, जनमुक्ति सेना, महिला नेतृ, केन्द्रीय सदस्य, कर्णाली प्रदेश महिला इन्चार्ज तथा केन्द्रीय आयोजक कमिटी सदस्य लगायतका जिम्मेवारीमा रहेर काम गरेको उनले बताएकी छन् ।

करिब १२ वर्ष विप्लव नेतृत्वको पार्टीमा रहेर काम गर्दा गिरफ्तारी र विभिन्न मुद्दाको सामना गर्नुपरेको उल्लेख गर्दै विकले आफूले अपेक्षित राजनीतिक उपलब्धि हासिल गर्न नसकेको महसुस गरेको बताइन् । उनका अनुसार राजनीतिक निर्णय लिन परिस्थितिले महत्वपूर्ण भूमिका खेल्ने भएकाले अन्याय, अत्याचार र विभेदविरुद्धको संघर्षलाई निरन्तरता दिन आफूले नयाँ राजनीतिक निर्णय लिएकी हुन् ।

रुकुमको जनयुद्धकालीन राजनीतिक पृष्ठभूमिबाट उदाएकी विकको नेपाली कम्युनिष्ट पार्टी प्रवेशलाई उनको समर्थकहरूले लामो राजनीतिक संघर्ष र महिला नेतृत्वको निरन्तरताका रूपमा लिएका छन् । उनको प्रवेशले विशेषगरी रुकुम तथा कर्णाली क्षेत्रमा वामपन्थी राजनीतिक वृत्तमा नयाँ राजनीतिक बहस सिर्जना गर्ने अपेक्षा गरिएको छ ।