रुकुम पश्चिम -२९, जेठ ।
रुकुम पश्चिमको त्रिवेणी गाउँपालिकाले “हाम्रो त्रिवेणी” नामक स्थानीय पाठ्यपुस्तक निर्माण गर्न लागेको छ । पालिकाको कक्षा १ देखि आठ सम्मको स्थानीय पाठ्यक्रम निर्माण भइसकेकाले सोही आधारमा पाठ्यपुस्तक निर्माण गर्न लागेको हो ।
गाउँपालिकाको शिक्षा शाखाले बताए अनुसार १ देखि आठ सम्मको पाठ्यक्रमलाई आधार बनाएर कक्षा १ देखि ५ सम्मको स्थानीय पाठ्यपुस्तकको अन्तिम मस्यौदा तयार भइसकेको छ । कक्षा ६ देखि ८ सम्मको पाठ्यपुस्तक भने तयार भइसकेको जनाइएको छ ।
पालिकाले यसै शैक्षिक सत्रमा हाम्रो त्रिवेणी नामक स्थानीय पाठ्यपुस्तक सबै विद्यार्थीको हात हातमा पुर्याउने लक्ष्य राखेको छ । सोही अनुसार बाँकी पाठ्यपुस्तक छपाइको काम पनि छिट्टै सक्ने जानकारी दिएको छ ।
स्थानीय पाठ्यपुस्तकले विद्यार्थीको ज्ञान सिपलाई व्यवहारिक बनाउने एवं स्थानीय भूगोल र संस्कृतिको पनि महत्त्वपूर्ण जानकारी हुने भएकाले स्थानीय पाठ्यपुस्तक निर्माणमा जोड दिइएको गाउँपालिकाले बताएको छ ।
यहाँको त्रिवेणी गाउँपालिकामा संस्थागत र सामुदायिक गरी ४७ वटा विद्यालय रहेका छन् । यस वर्षको शैक्षिक सत्रमा कक्षा १ देखि ८ सम्म पालिकाभर ३ हजार तीनसय ४४ विद्यार्थी अध्ययनरत छन् ।
