रुकुम पश्चिम -१२, जेठ 

जिल्ला प्रशासन कार्यालय रुकुम पश्चिम भागले आज एकै दिन दश वटा सरकारी कार्यालयको छड्के अनुगमन गरेको छ । नयाँ प्रमुख जिल्ला अधिकारीको रूपमा निशानराज गौतम आएसँगै प्रशासनले जिल्ला स्थित विभिन्न सरकारी कार्यालयको अनुगमन गरेको हो ।

जिल्ला प्रशासन कार्यालयका अनुसार शिक्षा विकास तथा समन्वय इकाइ, डिभिजन वन कार्यालय, कृषि विकास कार्यालय, पशु अस्पताल तथा पशु सेवा कार्यालय र कोष तथा लेखा नियन्त्रकको कार्यालयमा छड्के अनुगमन गरिएको छ ।

त्यस्तै सामाजिक विकास कार्यालय, उद्योग तथा उपभोक्ता हित संरक्षण कार्यालय, खानेपानी, सिंचाइ तथा उर्जा विकास कार्यालय, स्वास्थ्य सेवा कार्यालय र मुसिकोट नगरपालिका, नगरकार्यपालिकाको कार्यालयमा पनि छड्के अनुगमन गरिएको बताइएको छ ।

उक्त अनुगमनका क्रममा २ सय ५८ जना कर्मचारी उपस्थित रहेको, ४३ जना अनुपस्थित रहेको र २९ जना कर्मचारी काज/विदामा बसेको पाइएको छ ।

प्रशासनले ३१ जना कर्मचारीलाई भने कर्मचारी पोशाक लगाउन सचेत गरिएको जनाएको छ ।

जिल्ला प्रशासनले अनुगमनका क्रममा १० वटै कार्यालयका कर्मचारीलाई नियमित समय पालना गर्ने, काज/विदा स्वीकृत गरेर मात्र खटिने/बस्ने, कर्मचारी पोशाक तथा परिचयपत्रको अनिवार्य प्रयोग गर्ने, सेवाग्राहीप्रति सेवामैत्रीभाव प्रकट गर्ने, कार्यालय तथा कार्यालय परिसर सरफाईमा विशेष ध्यान दिन निर्देशन दिएको छ ।

यसैगरी कर्मचारीको हाजिर/काज/विदाको अद्यावधिक गराई हाजिरी अभिलेख व्यवस्थापन गर्ने, सेवाग्राहीसम्म सूचनाको सहज पहुँच पुर्‍याउन वेबसाइट तथा सामाजिक सञ्जालहरूलाई सक्रिय तुल्याउने, ई-हाजिरी जडान नगरेका कार्यालयहरुले यथाशीघ्र जडान गर्ने व्यवस्था मिलाउन पनि निर्देशन गरिएको प्रशासनले बताएको छ ।