रुकुम पश्चिम -२३, बैशाख ।
रुकुम पश्चिमको चौरजहारी विमानस्थल पुनः सञ्चालनमा आउने भएको छ । आठवर्ष अघिबाट बन्द रहेको विमानस्थल यसै सातादेखि सञ्चालनमा आउन लागेको हो ।
नेपाल वायुसेवा निगमको जहाजले हप्ताको एक दिन शुक्रबार नेपालगञ्ज-चौरजहारी-नेपालगञ्जको उडान भर्ने गरी विमानस्थल सञ्चालनमा ल्याउन लागिएको चौहरजहारी स्टेसनले बताएको छ । अबदेखि निगमको नियमित उडान सेवाले यहाँका नागरिकलाई आवतजावतमा सहज हुने भएको छ ।
लामो समयदेखि बन्द रहेको चौरजहारी विमानस्थल पुनः सञ्चालनका लागि प्रतिनिधि सभा सदस्य गोपाल शर्मा अनलले नेपाल वायुसेवा निगमसँग समन्वय गरिएको बताएका छन् । उनले निगमका निवर्तमान कार्यकारी निर्देशक तथा सञ्चालक अमृतमान श्रेष्ठ, निमित्त कार्यकारी निर्देशक जनक कालाखेती र नेपाल नागरिक उड्डयन प्राधिकरणका निमित्त महानिर्देशक देवचन्द्रलाल कर्णलाई भेटेर पुनः सञ्चालनका लागि पहल गरेका हुन् ।
सांसद शर्माले आगामी दिनमा विमानस्थलको थप स्तरोन्नति गर्दै आधुनिक र व्यवस्थित पूर्वाधार सहित विमानस्थललाई थप विकास गर्न पहल गर्ने प्रतिबद्धता समेत व्यक्त गरेका छन् ।
चौरजहारी विमानस्थललाई रुकुम पश्चिम लगायत जाजरकोट, सल्यान र डोल्पाको प्रमुख संगमस्थलको रूपमा लिने गरिन्छ । यहाँको विमानस्थल विक्रम सम्वत २०२८ सालबाट सञ्चालनमा आएपनि एक दशक अघि मात्रै धावन मार्ग कालोपत्रे गरिएको थियो ।
