रुकुम पश्चिम -१६, वैशाख ।

नेपाली कम्युनिष्ट पार्टी रुकुम पश्चिमको जिल्ला स्तरीय विस्तारित बैठक तथा प्रशिक्षण आज सेरीगाउँमा सुरु भएको छ । पार्टी संयोजक तथा पूर्व प्रधानमन्त्री पुष्पकमल दाहाल प्रचण्डको प्रमुख आतिथ्यतामा बैठक तथा प्रशिक्षण सुरु भएको हो ।

पार्टी जिल्ला समितिले आयोजना गरेको बैठकमा प्रमुख अतिथि प्रचण्डले प्रशिक्षण दिने कार्यक्रम रहेको जिल्ला संयोजक गोविन्द रोका सचिनले बताए । यस बैठकबाट पार्टीको आगामी रणनीति र कार्ययोजना तय गरिने जनाइएको छ ।

सहिद प्रतिष्ठान हलमा सुरु भएको विस्तारित बैठकमा अहिले पालिका स्तरीय रिपोर्टिङ र समीक्षाको कार्यक्रम चलिरहेको छ । विस्तारित बैठकमा पार्टीका नेता तथा जिल्ला कमिटी पदाधिकारी, सदस्य, पालिका स्तरीय समिति, जनसंगठनका प्रमुख पदाधिकारी लगायतको उपस्थिति रहेको छ ।

आज बिहान रुकुम आउनुभएका पार्टी संयोजक प्रचण्ड बिहिबार बिहान मात्रै आफ्नो निर्वाचन क्षेत्र रुकुम पूर्व जाने कार्यक्रम रहेको छ । रुकुम पूर्वमा समेत जिल्ला स्तरीय बैठक तथा प्रशिक्षण कार्यक्रममा सहभागी हुने र त्यसपछि रोल्पाको थवाङमा आयोजित एक कार्यक्रममा जाने बताइएको छ ।