रुकुम पश्चिम -१६, वैशाख ।
नेपाली कम्युनिष्ट पार्टीका संयोजक तथा पूर्व प्रधानमन्त्री पुष्पकमल दाहाल प्रचण्ड आज रुकुम पश्चिम आइपुग्नुभएको छ । जिल्ला पार्टीले आयोजना गरेको पार्टीको विस्तारित बैठक तथा प्रशिक्षण कार्यक्रममा सहभागी हुन रुकुम आउनुभएको हो ।
जिल्ला संयोजक गोविन्द रोका सचिनका अनुसार संयोजक प्रचण्डले मुसिकोट स्थित सेरीगाउँमा रहेको सहिद प्रतिष्ठान हलमा उपस्थित भएर पार्टी बैठकमा प्रशिक्षण दिने कार्यक्रम रहेको छ । विस्तारित बैठकमा पार्टी नेता तथा जिल्ला कमिटी पदाधिकारी, सदस्य, पालिका स्तरीय समिति, जनसंगठनका प्रमुख पदाधिकारी लगायतको सहभागिता रहने बताइएको छ ।
पार्टीको विस्तारित बैठक तथा प्रशिक्षणपछि संयोजक प्रचण्ड बिहिबार बिहान मात्रै आफ्नो निर्वाचन क्षेत्र रुकुम पूर्व जाने कार्यक्रम रहेको छ । रुकुम पूर्वमा पनि जिल्ला स्तरीय बैठक तथा प्रशिक्षण कार्यक्रममा सहभागी हुने र त्यसपछि रोल्पाको थवाङमा आयोजित एक कार्यक्रममा जाने बताइएको छ ।
