रुकुम पश्चिम -१४, वैशाख ।
जिल्ला प्रहरी कार्यालय रुकुम पश्चिमले पैदल यात्रीलाई ठक्कर दिएर फरार भएका मोटरसाइकल चालक सहित दुईजनालाई पक्राउ गरेको छ । वैशाख ९ गते बेलुकी ७:३० बजे सानीभेरी गाउँपालिका -९, हाँसीबाङका ७० वर्षीय दलबहादुर ओलीलाई सोही स्थानमा ठक्कर दिई फरार मोटरसाइकल चालक सहित दुईजनालाई पक्राउ गरेको हो ।
जिल्ला प्रहरी कार्यालयका प्रहरी निरीक्षक झविन्द्र परियारका अनुसार पक्राउ पर्नेमा बाँफीकोट गाउँपालिका -७ का २० वर्षीय मोटरसाइकल चालक पारस अधिकारी र पछाडि बस्ने सोही वडाका २१ वर्षीय खेमराज अधिकारी रहेका छन् ।
प्रहरीले उनीहरूलाई खोज तलासका क्रममा आइतबार बेलुका ६ बजे सोही वडाको दुलिङ्गाबाट नियन्त्रणमा लिएर थप अनुसन्धान थालिएको बताएको छ ।
मोटरसाइकलबाट घाइते ओलीको हाल मेडिकल कलेज कोहलपुरमा आइसियुमा राखी उपचार गरिँदै छ । उनको दाहिने खुट्टा भाँचिएको र पेटमा रगत जमेको जनाइएको छ । तर अवस्था सुधार हुँदै गइरहेको प्रहरीको भनाइ छ ।
