रुकुम पश्चिम -९, चैत ।
रुकुम पूर्वका स्वास्थ्य कर्मचारीलाई लक्षित गरेर मानसिक स्वास्थ्य सम्बन्धी पाँच दिने mhGAP Module 2 (मानसिक स्वास्थ्य अन्तर घटाउने कार्यक्रम) तालिम बुटवलमा सुरु भएको छ । स्वास्थ्य तालिम केन्द्र बुटवलको आयोजना तथा युनाइटेड मिसन टु नेपाल र नेपाल जनजागरण मञ्च रुकुमको आर्थिक तथा प्राविधिक सहयोगमा आइतबारदेखि तालिम सुरु भएको हो ।
स्थानीय तहमा मानसिक स्वास्थ्य सेवाको पहुँच र गुणस्तर अभिवृद्धि गर्न र मानसिक स्वास्थ्य समस्या भएकालाई समुदायमा पुनर्स्थापना गर्ने उद्देश्यले तालिम सञ्चालन गरिएको नेपाल जनजागरण मञ्च रुकुम पश्चिमका अध्यक्ष टेक बहादुर कुसारीले बताए ।
तालिममा पुथा उत्तरगंगा गाउँपालिका र भूमे गाउँपालिकाका स्वास्थ्य संस्थामा कार्यरत १३ जना स्वास्थ्यकर्मीको सहभागिता रहेको छ । तालिम चैत १२ गतेसम्म सञ्चालन हुने बताइएको छ ।
स्वास्थ्य तालिम केन्द्र बुटवलका निमित्त निर्देशक भुवन कुँवरको अध्यक्षतामा उद्घाटन गरिएको तालिममा देवदह मेडिकल कलेजमा मनोचिकित्सकका रूपमा कार्यरत डाक्टर विक्रम काफ्लेले प्रशिक्षण दिने संस्थाका अध्यक्ष कुसारीको भनाइ छ ।
युनाइटेड मिसन टु नेपाल कर्णाली प्रदेश कलस्टरको आर्थिक सहयोगमा नेपाल जनजागरण मञ्चद्वारा सञ्चालित परियोजना अन्तर्गत तालिम आयोजना गरिएको छ । यो कार्यक्रमले ग्रामीण क्षेत्रमा मानसिक स्वास्थ्य सेवा सुदृढ बनाउन महत्वपूर्ण योगदान पुर्याउने अपेक्षा गरिएको छ ।
