रुकुम पश्चिम -६, चैत ।
रुकुम पश्चिमको त्रिवेणी गाउँपालिका वडानम्बर -१, का पत्रकार तथा समाजसेवी आनन्द पुनले पालिकाको तीनवटा स्वास्थ्य चौकीलाई औषधि उपलब्ध गराउने अभियान सुरु गरेका छन् । स्वास्थ्य चौकीबाट सहजै रुपमा उपलब्ध हुने सबै प्रकारका औषधि खरिद गरेर तीनवटा स्वास्थ्य चौकीलाई प्रदान गर्ने अभियान सुरु गरेका हुन् ।
अभियान अन्तर्गत बिहीबार वडानम्बर -४ खुम्चेरीमा रहेको खारा स्वास्थ्य चौकीलाई आवश्यक औषधि उपलब्ध गरिएको पुनले बताए । उनका अनुसार तीनवटा स्वास्थ्य चौकीका लागि करिब १० लाख बराबरको औषधि एकैपटक खरिद गरिएको छ ।
खारा स्वास्थ्य चौकीलाई औषधि उपलब्ध गराउने कार्यक्रममा त्रिवेणी गाउँपालिकाका अध्यक्ष गणेशकुमार केसी र वडाध्यक्ष नन्नराम बाँठाको उपस्थितिमा रहेको थियो ।
कलाकार समेत रहेका पुनले आउँदो आइतबार नुवाकोट स्वास्थ्य चौकीलाई औषधि उपलब्ध गराउने कार्यक्रम रहेको बताएका छन् । त्यसपछि पूर्व निर्धारित कार्यक्रम अनुसार नै सिम्रुतु स्वास्थ्य चौकीलाई समेत आवश्यक औषधि उपलब्ध गराउने कार्यक्रम रहेको पुनको भनाइ छ ।
पुनको समाजसेवालाई लिएर स्थानीय जनप्रतिनिधि र नागरिकले उनलाई धन्यवाद व्यक्त गरेका छन् ।
