रुकुम पश्चिम -४, चैत ।
रुकुम पूर्वको पुथा उत्तरगंगा गाउँपालिकाको तकसेरामा सामुदायिक रूपान्तरण परियोजना अन्तर्गतको अभिमुखीकरण कार्यक्रम सम्पन्न भएको छ । युएमएन कर्णाली प्रदेश सुर्खेत र नेपाल जनजागरण मञ्च रुकुम पश्चिम क्लष्टरको साझेदारीमा एकदिने अभिमुखीकरण कार्यक्रम सम्पन्न भएको हो ।
कार्यक्रममा जनजागरण मञ्चका कर्मचारी सहित ४२ जनाको सहभागिता रहेको अध्यक्ष टेकबहादुर कुसारीले बताए । उनका अनुसार अभिमुखीकरण कार्यक्रममा परियोजना अधिकृत हस्तबहादुर भाग्रीले सञ्चालनको तयारीमा रहेको परियोजनाको विषयवस्तुमा प्रस्तुतीकरण राखेका थिए ।
अभिमुखीकरण कार्यक्रममा पालिकाका सबै वडा अध्यक्ष, कार्यपालिका सदस्य, शाखा प्रमुख तथा सामुदायिक महिला स्वास्थ्य स्वयंसेविकाको उपस्थिति रहेको बताइएको छ ।
यस सामुदायिक रूपान्तरण परियोजना पुथा उत्तरगंगा गाउँपालिकामा सञ्चालन हुने बताइएको छ । परियोजनाको कुल लागत १ करोड ३२ लाख १८ हजार ९ सय रहेको छ ।
परियोजनाले विशेषगरी मानसिक स्वास्थ्य समस्याको दिगो व्यवस्थापनमा केन्द्रित रहेर समुदायमा सचेतना अभिवृद्धि, आमा समूह, महिला स्वास्थ्य स्वयंसेविका, शिक्षक, विद्यार्थी तथा धार्मिक अगुवाको क्षमता विकास गर्ने लक्ष्य राखेको छ ।
त्यस्तै मानसिक स्वास्थ्य सम्बन्धी सेवा सुदृढीकरण, औषधि तथा उपकरण सहयोग, प्रभावित व्यक्तिलाई आयआर्जनमा सहयोग, स्वास्थ्य संस्थाको सुदृढीकरण तथा नीति निर्माण र पैरवीमा समेत सहयोग गर्ने कार्यक्रम रहेको छ ।
परियोजनाका लक्ष्य, उद्देश्य, क्रियाकलाप तथा रणनीतिलाई प्रभावकारी रूपमा कार्यान्वयन गर्न स्थानीय सरकारले सरकारी कार्यक्रमसँग एकीकृत गरी कार्यान्वयन गर्ने प्रतिबद्धता समेत व्यक्त गरेको छ ।
नेपाल जनजागरण मञ्चका सामाजिक परिचालक पृथ्वीबहादुर छन्त्यालले सञ्चालन गरेको कार्यक्रमको अध्यक्षता संस्थाका अध्यक्ष टेक बहादुर कुसारीले गरेका थिए । पुथा उत्तरगंगा गाउँपालिकाका प्रमुख प्रशासकीय अधिकृत ध्रुव विकको प्रमुख आतिथ्यता रहेको कार्यक्रममा संस्थाका आजीवन सदस्य थल बहादुर शेरचनले स्वागत मन्तव्य राखेको जनाइएको छ ।
