रुकुम पश्चिम -२७, फागुन ।

फागुन २१ गते सम्पन्न प्रतिनिधि सभा सदस्य निर्वाचन अन्तर्गत समानुपातिक तर्फको मतगणना सकिएको छ । देशका १ सय ६५ निर्वाचन क्षेत्रको मतगणना आज सकिएको निर्वाचन आयोगले बताएको छ ।

आयोगले कुल १ करोड ८ लाख बढी सदर मत मध्य सबैभन्दा धेरै राष्ट्रिय स्वतन्त्र पार्टीलाई जनमत प्राप्त भएको जनाएको छ । रास्वपालाई ५१ लाख बढी मत प्राप्त भएको छ । यही मतका आधारमा रास्वपा देशकै पहिलो र ठूलो राजनीतिक दल बनेको छ ।

त्यस्तै समानुपातिक तर्फ नेपाली काङ्ग्रेसले साढे १७ लाख मत प्राप्त गर्दा नेकपा एमालेले १४ लाख बढी र नेपाली कम्युनिष्ट पार्टीले ८ लाख बढी मत प्राप्त गरेको आयोगले बताएको छ ।

यसैगरी श्रम संस्कृति पार्टीले ३ लाख ८५ हजार र राष्ट्रिय प्रजातन्त्र पार्टीले ३ लाख ३० हजार मत प्राप्त गरेको छ ।

समग्रमा समानुपातिक मत परिणाम पछि प्राप्त मतका आधारमा यी ६ वटा राजनीतिक दल राष्ट्रिय पार्टी बन्न सफल भएका छन् । कूल सदर मतको ३ प्रतिशत प्राप्त नगर्ने अन्य राजनीतिक दलहरूले थ्रेसहोल्ड कटाउन नसक्दा राष्ट्रिय पार्टी बन्न सकेनन् ।