रुकुम पश्चिम -२४, फागुन ।
रुकुम पश्चिमबाट नवनिर्वाचित प्रतिनिधि सभा सदस्य गोपाल शर्मा अनलले अबदेखि आफू सबैको साझा प्रतिनिधि भएको बताएका छन् । फागुन २१ गतेको निर्वाचन मत परिणामपछि विजयी बनेका शर्माले मुसिकोटमा आज आयोजित विजयी सभामा बोल्दै सबै रुकुमेलीको प्रतिनिधि भएको बताएका हुन् ।
उनले फागुन २१ गतेसम्म मात्रै आफू उम्मेदवारको रूपमा प्रतिस्पर्धी भएको, तर आजदेखि पाँच वर्षसम्मका लागि सबै राजनीतिक दल र आम रुकुमेलीको साझा प्रतिनिधि भएको बताए । सभामा बोल्दै शर्माले पाँच वर्षको अवधिमा रुकुमेली जनताको समृद्धि र विकासका लागि आफूले इमान्दारितापूर्वक काम गर्ने प्रतिबद्धता समेत जनाएका छन् ।
जनताले नै चुनेर संघीय सांसदको प्रतिनिधि बनाएकाले जनताकै सुझाव र सल्लाह अनुसार काम गर्ने शर्माको भनाइ छ । काम गर्ने सिलसिलामा कतै गल्ती भएमा रुकुमेली जनताको साथ र ध्यानाकर्षणलाई सिरोपर गर्दै रुकुमको शिर ठाडो बनाउने काम गर्ने नवनिर्वाचित सांसद शर्माले प्रतिबद्धता व्यक्त गरेका छन् ।
त्यस्तै उनले गोपाल शर्मा कुनै प्रभावशाली व्यक्ति नभएको, तर जनताले पार्टीलाई रोजेको र त्यो पार्टीले नै जनताको सेवा गर्ने विश्वास व्यक्त गरेका छन् । कम्युनिस्ट पार्टीको विचार र सिद्धान्तमा रहेर आगामी पाँच वर्षको कार्यकालभर रुकुमको कृषि उत्पादन मार्फत रोजगारी सिर्जना गर्ने कुरामा आफ्नो भूमिका रहने बताए ।
रुकुम पश्चिमबाट नेपाली कम्युनिष्ट पार्टीबाट प्रतिनिधि सभा सदस्यमा विजयी भएका शर्माले २१ हजार ६ सय ९ मत प्राप्त गरेका हुन् ।
उनले निकटतम प्रतिस्पर्धी नेपाली कांग्रेसका उम्मेदवार राजु केसीलाई ४ हजार ९ सय ४८ मतले पछि पारे । कांग्रेस उम्मेदवार केसीले १६ हजार ६ सय ६१ मत प्राप्त गरे ।
फागुन २१ गतेको प्रतिनिधि सभा सदस्य निर्वाचनमा रुकुम पश्चिममा ६२ हजार ५ सय ३९ मत खसेको थियो । कुल ५९ हजार ५ सय २३ मत सदर हुँदा ३ हजार १६ मत बदर भयो । यसपटकको निर्वाचनमा रुकुम पश्चिमबाट १२ जना उम्मेदवारले उम्मेद्वारी दर्ता गराएका थिए ।
कूल १ लाख ६ हजार ६ सय ६६ मतदाता रहेको रुकुम पश्चिममा ५९ दशमलव ०३ प्रतिशत मत खसेको थियो ।
फागुन २१ गते सम्पन्न प्रतिनिधि सभा सदस्य प्रत्यक्ष तर्फको मतगणना गए राती सार्वजनिक गरिएको थियो । समानुपातिक तर्फको मत गणना भने जारी रहेको मुख्य निर्वाचन अधिकृतको कार्यालयले बताएको छ ।
