रुकुम पश्चिम -२२, फागुन ।

रुकुम पश्चिममा सर्वदलीय बैठक सुरु भएको छ । बिहीबार सम्पन्न प्रतिनिधि सभा सदस्य निर्वाचनको मत गणनाका लागि सर्वदलीय बैठक सुरु भएको हो ।

जिल्ला समन्वय समितिको कार्यालय स्थित मुख्य निर्वाचन अधिकृतको कार्यालयमा सर्वदलीय बैठक भर्खरै सुरु भएको छ । बैठकमा मुख्य निर्वाचन अधिकृत सहित राजनीतिक दलका उम्मेदवार र पार्टी प्रतिनिधि लगायतको उपस्थिति रहेको छ ।

बैठक सकिए लगत्तै मतगणना कार्य सुरु हुने मुख्य निर्वाचन अधिकृत दिपेन्द्र थापा मगरको भनाइ छ । जिल्लाका सबै मतदान केन्द्रबाट गएराति नै मतपेटीका आइपुगेकाले मत गणना अघि सर्वदलीय बैठक सुरु गरिएको हो ।

मतगणनाका लागि गणना स्थलमा सिसी क्यामेरा सहित सुरक्षा व्यवस्था कडा बनाइएको छ । जिल्ला समन्वय समितिको हलमा मतगणना स्थल तयार पारिएको छ ।