रुकुम पश्चिम -६, फागुन ।

रुकुम पश्चिमको मुसिकोटमा शैक्षिक गुणस्तर अभिवृद्धिका लागि माध्यमिक तहका प्रधानाध्यापकसँग अन्तरक्रिया तथा क्षमता विकास कार्यक्रम सुरु गरिएको छ । शिक्षा विकास तथा समन्वय इकाई कार्यालयको आयोजनामा जिल्लाका सबै माध्यमिक तहका प्रधानाध्यापकहरूको उपस्थितिमा अन्तरक्रिया तथा क्षमता विकास कार्यक्रम सुरु गरिएको हो ।

एक दिने क्षमता विकास कार्यक्रममा शैक्षिक क्षेत्रको व्यवस्थापन, नियमित अनुगमन, मूल्याङ्कन तथा परीक्षा प्रणालीका सन्दर्भमा अन्तरक्रिया गरिने शिक्षा विकास तथा समन्वय इकाई कार्यालयले बताएको छ । त्यस्तै शिक्षकहरूका समस्या, कार्यसम्पादन तथा व्यवस्थापनका विषयमा पनि अन्तरक्रिया गरिने छ ।

कार्यक्रममा छ वटै पालिकामा रहेका ८२ वटा माध्यमिक तहका प्रधानाध्यापक सहभागी छन् । उक्त अन्तरक्रिया तथा क्षमता विकास कार्यक्रमले विद्यालयको शैक्षिक गुणस्तर वृद्धिमा सघाउ पुर्‍याउने शिक्षा विकास तथा समन्वय इकाईका प्राविधिक सहायक माधवी पुनको भनाइ छ ।

कार्यक्रम मुसीकोट नगरपालिका -५, सेरीगाउँ स्थित सहिद प्रतिष्ठानको हलमा सुरु गरिएको छ ।