रुकुम पश्चिम -२२, माघ ।
रुकुम पश्चिममा पाठेघरको मुखको क्यान्सर रोग विरुद्ध नियमित एचपीभी खोप सञ्चालन हुने भएको छ । विद्यालय तहमा अध्ययनरत १० देखि १४ वर्ष उमेर समूहका किशोरीलाई लक्षित गरेर एचपीभी खोप सञ्चालन गर्न लागिएको हो ।
स्वास्थ्य सेवा कार्यालयका व्यवस्थापक जीवन परियारका अनुसार माघ २७ देखि फागुन १ गतेसम्म एचपीभी खोप सञ्चालन हुने कार्यक्रम निश्चित गरिएको छ । नियमित कार्यक्रम अन्तर्गत जिल्ला भरका एकहजार ८ सय ५० जना किशोरीलाई खोप लगाउने लक्ष्य राखिएको छ ।
जसमध्ये विद्यालयमा अध्ययनरत एकहजार ७ सय ७९ र विद्यालय नजाने ७१ जना किशोरी रहेका छन् । एचपीभी खोप सञ्चालनका लागि एकसय २८ विद्यालय र ७६ स्वास्थ्य संस्थालाई केन्द्रको रूपमा प्रयोग गरिने बताइएको छ । विद्यालयमा दिइने एचपीभी खोप कार्यक्रममा एकसय २८ जना स्वास्थ्यकर्मी खटिने भएका छन् । तर विद्यालयमा छुट भएका किशोरीका लागि भने स्वास्थ्य संस्थाबाटै उक्त खोप दिने व्यवस्था मिलाइएको छ ।
राष्ट्रिय खोप कार्यक्रम अन्तर्गत नेपाल सरकारको उच्च प्राथमिकतामा प्राप्त यो अभियानले अपाङ्गता दर र मृत्युदर कम गर्ने लक्ष्य राखेको छ । पाठेघरको मुखको क्यान्सर नियन्त्रण गर्न नेपाल सरकारले २०३० सम्म ९० प्रतिशत खोप लगाउने लक्ष्य राखेको छ ।
उक्त लक्ष्य पूरा गर्न सरकारले गत वर्षदेखि विद्यालय तहमा पुगेर अभियानकै रूपमा पाठेघरको मुखको क्यान्सर रोग विरुद्ध नियमित एचपीभी खोप कार्यक्रम सञ्चालन गर्दै आइरहेको छ ।
रुकुम पश्चिममा माघ २७ देखि सुरु हुने पाठेघरको मुखको क्यान्सर रोग विरुद्ध नियमित एचपीभी खोप सम्बन्धी जानकारी दिन आज मुसिकोटमा एक अभिमुखीकरण बैठक सम्पन्न गरिएको छ । स्वास्थ्य सेवा कार्यालयले आयोजना गरेको बैठकमा जिल्ला खोप समन्वय समिति र सञ्चारकर्मी लगायत सरोकारवालाको उपस्थिति रहेको थियो ।
