रुकुम पश्चिम -१६, माघ ।

नेपाली कम्युनिस्ट पार्टीका नेता तथा उम्मेदवार गोपाल शर्माले आफ्नो उम्मेदवारी पहिलो र अन्तिम भएको घोषणा गरेका छन् । फागुन २१ गते हुने प्रतिनिधि सभा निर्वाचनका लागि उम्मेदवार बनेका शर्माले यसपटकको उम्मेदवारी पहिलो र अन्तिम भएको घोषणा गरेका हुन् ।

निर्वाचन प्रचार प्रसार तथा जनतासँग भेटघाटको सिलसिलामा बाँफिकोट गाउँपालिका पुगेका शर्माले पहिलोपटकको उम्मेदवारी नै अन्तिम हुने बताए । शुक्रबार वडानम्बर -७ र ८ का नेता कार्यकर्ता तथा मतदाता सँगको भेटघाटमा आफू एकपटक प्रदेश सभाको सांसद र मन्त्री भइसकेकाले पुनः आफू प्रदेशमा नदोहोरिने त्यो बेलाको वाचा सम्झदै शर्माले प्रतिनिधि सभाका लागि आफ्नो यो उम्मेदवारी पहिलो र अन्तिम भएको स्पष्ट पारेका छन् ।

उनले यसपटकको निर्वाचनमा होमिएका अन्य प्रतिस्पर्धी केही उम्मेद्वारलाई समेत लक्षित गर्दै आफू सातौँ र दशौँ पटक दोहोरिन नचाहेको बताए । बरु जनताको जनप्रतिनिधि भएर प्रतिनिधि सभाको एक कार्यकाल पूरा गर्ने र नयाँ अनुहारलाई अवसर दिने शर्माको भनाइ छ ।

त्यस्तै नेता शर्माले रुकुम पश्चिममा नेपाली कम्युनिस्ट पार्टीको संगठन बलियो रहेको दाबी गर्दै संगठनकै बलमा आफूले भारी मतान्तरले फागुन २१ को चुनाव जित्ने ठोकुवा गरेका छन् ।