रुकुम पश्चिम -१५, माघ ।

सामाजिक विकास कार्यालय रुकुम पश्चिमले स्थानीय तहमा कार्यरत कर्मचारीका लागि क्षमता अभिवृद्धि तालिम आयोजना गरेको छ । महिला बालबालिका तथा शिक्षा शाखामा कार्यरत कर्मचारीलाई लक्षित गरेर दुई दिने क्षमता अभिवृद्धि तालिम आयोजना गरेको हो ।

मुसिकोटमा आजदेखि सुरु भएको तालिमको जिल्ला समन्वय समितिका उपप्रमुख देवबहादुर विकले उद्घाटन गरे । आज र भोलिसम्म चल्ने उक्त तालिममा तनाव व्यवस्थापन, भाषिक शुद्धता, जेष्ठ नागरिक, टिप्पणी लेखन तथा अभिलेख व्यवस्थापन सम्बन्धी विषयवस्तुमा छलफल गरिने सामाजिक विकास कार्यालयका निमित्त प्रमुख ध्रुवकुमार बाँठाले बताए ।

त्यस्तै समावेशीकरण, समता एवं महिला बालबालिका र अपाङ्गताका सम्बन्धमा पनि छलफल गरिने भएको छ । तालिममा विद्यालय तहमा बढ्दै गएको लागू औषध दुर्व्यवसनी, सुधारका अभ्यास तथा बालविवाह न्यूनीकरणका विषयमा समेत अभिमुखीकरण चलाइने बताइएको छ ।

तालिममा ६ वटै पालिका तथा कार्यालयको इकाइ शाखाबाट करिब २२ जना कर्मचारीको सहभागिता रहेको सामाजिक विकास कार्यालयले बताएको छ ।

तालिममा जिल्ला समन्वय समितिका समन्वय अधिकारी मेघराज सोनी लगायतले सहजीकरण गर्ने कार्यक्रम रहेको छ । दुई दिने क्षमता अभिवृद्धि तालिम शिक्षा विकास तथा समन्वय इकाई कार्यालयको तालिम हलमा सुरु भएको छ ।