रुकुम पश्चिम -२४, पुस ।
रुकुम पश्चिमको सल्लेमा रुकुम सर्जिकल आँखा उपचार केन्द्रको आज भवन निर्माण शुभारम्भ गरिएको छ । राष्ट्रिय सभा सदस्य कृष्णबहादुर रोकाय र कर्णाली प्रदेश सरकारका सामाजिक विकास मन्त्री घनश्याम भण्डारीको उपस्थितिमा भवन निर्माण शुभारम्भ गरिएको हो ।
उपचार केन्द्रका इन्चार्ज धनबहादुर केसीका अनुसार प्रमुख अतिथि रोकाय र विशेष अतिथि भण्डारीले भवनको शिलान्यास गरेका छन् । यहाँ बन्ने आँखा उपचार केन्द्रको भवन साढे तीन तलाको हुनेछ । १७ कोठे भवन निर्माणको काम बहुवर्षीय योजना मार्फत १८ महिनामा सम्पन्न गरिसक्नुपर्नेछ ।
स्थानीय बासिन्दा र राप्ती आँखा अस्पतालको सहयोगमा आँखा उपचार केन्द्रलाई जग्गा उपलब्ध गराइएको छ । यस आँखा उपचार केन्द्रको भवन निर्माणका लागि सहरी विकास मन्त्रालयको २ करोड ८० लाख लागत रहेको बताइएको छ ।
रुकुम पश्चिममै आँखा उपचार केन्द्रले आफ्नै भवन निर्माणको काम सुरु गर्नु महत्त्वपूर्ण भएको राष्ट्रिय सभा सदस्य रोकायले बताए ।
आज शुभारम्भ गरिएको भवन निर्माणको कामलाई समयमै सम्पन्न गर्न सबै पक्षको भूमिका हुनुपर्ने उहाँको भनाइ थियो ।
त्यस्तै कर्णाली प्रदेश सरकारका सामाजिक विकास मन्त्री घनश्याम भण्डारीले यस भवन सर्जिकल आँखा उपचार केन्द्र मात्र नभई भविष्यमा अस्पतालको रूपमा विकास हुने बताए ।
भवन शुभारम्भ कार्यक्रममा कर्णाली प्रदेश सभाका सदस्य तुलसा मल्ल र मिलन खड्का रोका लगायत सरोकारवाला निकायको उपस्थिति रहेको थियो ।
