रुकुम पश्चिम -२३, पुस ।

प्रगतिशील लोकतान्त्रिक पार्टी रुकुम पश्चिमले जनार्दन शर्मालाई एकल उम्मेदवारमा सर्वसम्मत सिफारिस गरेको छ । प्रलोपा बैठकले आगामी फागुन २१ गते हुने प्रतिनिधि सभा निर्वाचनका लागि शर्मालाई उम्मेदवारका रुपमा सिफारिस गरेको हो ।

प्रलोपाका मुसिकोट संयोजक तथा नेता दलबहादुर खड्काले अहिलेको राजनीतिक अवस्थामा शर्मा नै उपयुक्त पात्र भएकाले पार्टीको बैठकबाट शर्मालाई उम्मेदवारमा सिफारिस गरिएको बताए । पार्टीको यो निर्णयले कार्यकर्तामा उत्साह थपिएको उनको भनाइ छ । साथै आगामी निर्वाचनमा प्रलोपा उम्मेदवारको जित सुनिश्चित गर्नलाई पनि शर्माको नै आवश्यकता देखिएको प्रलोपा रुकुम पश्चिमले बताएको छ ।

शर्मा शान्ति प्रक्रियापछि २०६४ र ७० को संविधानसभामा रुकुम पश्चिमबाट माओवादी केन्द्रबाट विजयी भएका थिए । त्यस्तै २०७४ र ७९ को प्रतिनिधि सभा सदस्य निर्वाचनमा पनि शर्मा भारी मतले विजयी भएर संघीय संसदमा रुकुमेली जनताको प्रतिनिधित्व गरेका थिए ।

उनी नेपाल सरकारको शान्तिमन्त्री, ऊर्जा, गृह तथा अर्थमन्त्री समेत भइसकेका छन् । माओवादी विघटनपछि प्रगतिशील लोकतान्त्रिक पार्टीमा लागेका नेता शर्माको उम्मेदवारीले रुकुम पश्चिमको चुनावी माहोल तरङ्गित हुने अनुमान गरिएको छ ।

यसअघि नेपाली कम्युनिष्ट पार्टीले गोपाल शर्मा अनललाई एकल उम्मेदवारको रुपमा सिफारिस गरिसकेको छ । त्यस्तै नेकपा एमालेले नन्दराम देवकोटा, नेपाली कांग्रेसले प्रेम प्रकाश ओली, गोपालजी जंग शाह र लेखमाया केसीलाई उम्मेदवारको रूपमा सिफारिस गरेको छ ।

यसैगरी नेपाल कम्युनिस्ट पार्टी (माओवादीले) चन्द्र बहादुर बुढालाई एकल उम्मेदवारको रुपमा सिफारिस गरेको छ । केही राजनीतिक दलले भने उम्मेदवारको टुङ्गो लगाइसकेका छैनन् ।

तर आगामी निर्वाचनका लागि जिल्लाका क्रियाशील राजनीतिक दलहरूले प्रतिनिधि सभा सदस्यका लागि उम्मेदवारहरू सिफारिस गरेसँगै रुकुम पश्चिममा विभिन्न राजनीतिक गतिविधि बढ्दै गएका छन् ।