रुकुम पश्चिम – २५, मङ्सिर ।
नेपाल प्रिमियर लिग अन्तर्गत आज भएको दोस्रो क्वालिफायरमा लुम्बिनी लायन्सले विराटनगरलाई पराजित गर्दै फाइनल प्रवेश गरेको छ । टियु अन्तर्राष्ट्रिय क्रिकेट मैदानमा भएको दोस्रो क्वालिफायरमा लुम्बिनीले विराटनगरलाई ४० रनले पराजित गरेको हो ।
यो जितसँगै लुम्बिनीले सुदूरपश्चिम सङ्गको फाइनल भेट पक्का गरेको छ । अब उपाधि भिडन्त शनिबार हुने छ ।
यसअघि आज भएको क्वालिफायरमा विराटनगरले टस जितेर पहिला फिल्डिङ रोजेको थियो । ब्याटिङ गरेको लुम्बिनीले १ सय ३५ रनको टार्गेट दिएकोमा विराटनगर ९४ रनमा अल आउट भयो । यो हारसँगै उपाधि दावेदार मानिएको विराटनगर प्रतियोगिताबाट बाहिरिएको छ ।
सुदूरपश्चिम रोयल्स सँग पहिलो क्वालिफायरमा पराजित विराटनगर दोस्रो क्वालिफायरमा पनि लुम्बिनीसँग पराजित हुन पुग्यो । लुम्बिनीले भने एलिमिनेटरमा काठमाडौँ गोर्खाजलाई हराउँदै दोस्रो क्वालिफायरमा प्रवेश गरेको थियो ।
पहिलो संस्करणको एनपीएल उपाधि जनकपुर बोल्ट्सले जितेको थियो । तर यसपटक जनकपुर प्रतियोगितामा एक मात्र खेल जितेर अंकतालिकाको पुछारमा रह्यो ।
