रुकुम पश्चिम – २४, मङ्सिर ।
नेपाल प्रिमियर लिग अन्तर्गत आज एलिमिनेटरको खेल काठमाडौँ गोर्खाज र लुम्बिनी लायन्स बिच प्रतिस्पर्धा हुँदैछ । खेल अहिले दिउँसो ४ बजेबाट टियु अन्तर्राष्ट्रिय क्रिकेट मैदानमा सुरु हुनेछ ।
एलिमिनेटरमा विजेता हुने टोलीले फाइनल प्रवेशका लागि बिहीबार दोस्रो क्वालिफायर
खेल्नुपर्नेछ । पहिलो क्वालिफायरमा सुदूरपश्चिम रोयल्सबाट पराजित विराटनगरसँग उक्त खेल हुनेछ । आज पराजित हुने टोली भने प्रतियोगिताबाट बाहिरिनेछ ।
मङ्गलबार सम्पन्न पहिलो क्वालिफायरमा सुदूरपश्चिमले विराटनगरलाई ७८ रनले पराजित गर्दै दोस्रो संस्करणको एनपीएलमा फाइनल प्रवेश गर्ने पहिलो टोली बनेको छ ।
मङ्सिर १ गतेदेखि सुरु भएको दोस्रो संस्करणको नेपाल प्रिमियर लिग एनपीएलमा कुल ८ वटा टिमको सहभागिता रहेकोमा चारवटा टिम लिग चरणबाटै बाहिरिएका छन् ।
यसपटक टियु अन्तर्राष्ट्रिय क्रिकेट मैदानमा फ्लड लाईट र कुर्सी राखेपछि रात्रिकालीन समयमा पनि एनपीएलका खेलहरू सञ्चालन भएका छन् । एनपीएलमा एसोसिएट र टेष्ट राष्ट्रका खेलाडीहरूको समेत सहभागिता रहेको छ ।
एनपीएलको फाइनल खेल मङ्सिर २७ गते शनिबार हुनेछ । पहिलो संस्करणको एनपीएल उपाधि जनकपुर बोल्ट्सले जितेको थियो । तर यसपटक जनकपुर प्रतियोगितामा एक मात्र खेल जितेर अंकतालिकाको पुछारमा रह्यो ।
