रुकुम पश्चिम -२२, मङ्सिर ।

प्रगतिशील लोकतान्त्रिक पार्टीका नेता तथा पूर्वमन्त्री जनार्दन शर्माले परिवर्तन र विकासको भारी बोक्न जनता तयार रहेको बताएका छन् । सदरमुकाम मुसिकोट खलंगामा प्रगतिशील लोकतान्त्रिक पार्टीले आयोजना गरेको युवा प्रशिक्षण कार्यक्रममा बोल्दै शर्माले आजका जनताले परिवर्तन र विकास चाहेको बताए । यसका लागि आफू जीवनभर जनताको सेवा र परिवर्तनमा समर्पित रहेको उल्लेख गरे ।

कार्यक्रममा नेता शर्माले विशेष रूपमा युवाको भूमिकालाई जोड दिंदै भने, “हामीले नयाँ पुस्तालाई नेतृत्व दिने अवसर दिनुपर्छ । आजको जेन्जी पुस्ता सचेत छ, ऊ परिवर्तन चाहन्छ र त्यो आन्दोलनलाई हामी स्वागत गर्छौँ ।” उनले पार्टीमा युवालाई निर्णय प्रक्रियामा ल्याउन प्रतिबद्ध रहेको समेत स्पष्ट पारे ।

शर्माले आफ्नो ५० वर्षको सार्वजनिक सेवाको अनुभव उल्लेख गर्दै आर्थिक, सामाजिक र सांस्कृतिक परिवर्तन तर्फ पार्टीले केंद्रित भएर काम गरिरहेको बताए ।

उनका अनुसार आर्थिक जीवनमा रूपान्तरण, रोजगारको ग्यारेन्टी, गरिबी अन्त्य, र समाजवादको मूल्य–मान्यतामा आधारित शासन प्रणाली पार्टीको दीर्घकालीन लक्ष्य रहेका छन् ।

शर्माले सही काम गर्ने संस्कृतिको विकास, पारदर्शिता, नयाँ तरिकाले समाज परिवर्तन र जनताले गर्व गर्न सक्ने काम गर्न आफू र आफू आवद्ध पार्टी तत्पर रहेको बताए । “हामी परिवर्तनका लागि जन्मिएका छौँ, कठिनाइ आए पनि जनता तयार छन्, हामी पनि तयार छौँ,” उनले भने ।

प्रशिक्षण कार्यक्रममा प्रगतिशील लोकतान्त्रिक पार्टीमा आबद्ध युवाहरूको उल्लेख्य सहभागिता रहेको थियो ।