रुकुम पश्चिम -२६, कात्तिक ।
नेपाली कम्युनिस्ट पार्टी र मातृभूमि जागरण अभियान नेपालबिच आज एकीकरणका लागि औपचारिक सहमति भएको छ । कम्युनिष्ट पार्टीका संयोजक पुष्पकमल दाहाल प्रचण्ड र सहसंयोजक माधवकुमार नेपाल तथा जागरण अभियानका संयोजक भीम रावलले सहमतिपत्रमा हस्ताक्षर गर्दै एकीकरणका लागि सहमति गरेका हुन् ।
देश र जनताको सर्वोपरी हित एवं सुशासन, सामाजिक न्याय र आर्थिक-सामाजिक रुपान्तरणको अभिभारा पूरा गर्ने सङ्कल्पका साथ एकीकरण प्रक्रियामा सहमत हुने सहमति पत्रमा जनाइएको छ । सात बुँदे सो सहमति पत्रमा देशभक्ति तथा समाजवादको आदर्शयुक्त, सशक्त र सुदृढ पार्टी निर्माण गर्ने भनिएको छ ।
यस्तो छ नेपाली कम्युनिस्ट पार्टी र मातृभूमि जागरण अभियान बीच एकीकरणका लागि तयार पारिएको सहमति पत्र ।
(१) नेपाल र नेपाली जनताको सर्वोपरी हित, राष्ट्रिय सार्वभौमिकता, एकता, स्वाधीनता, अखण्डता, स्वाभिमान तथा आत्मनिर्णयको अधिकारलाई अक्षुण्ण राख्दै वाह्य हस्तक्षेप र दवावबाट मुक्त राजनीति, राष्ट्रिय अर्थतन्त्र एवं संस्कृतिको मार्गमा अग्रसर रहने ।
(२) समाजवाद एवं सामाजिक न्यायको मान्यतामा आधारित आर्थिक-सामाजिक रुपान्तरण र समृद्धिको लागि कटिबद्ध रहने ।
(३) आगामी ६ महिना भित्र एकता राष्ट्रिय महाधिवेशन गर्ने । महाधिवेशनको मिति र स्थान सचिवालयले यथाशीघ्र निर्धारण गर्ने । सबै तहमा र मातृभूमि जागरण अभियान, नेपाल अन्तर्गत विभिन्न तहमा क्रियाशील व्यक्तिहरुलाई नेपाली कम्युनिष्ट पार्टीको सोही तहमा पारस्परिक सहमतिले समायोजन गर्ने ।
(४) नेपाली कम्युनिष्ट पार्टीमा मातृभूमी जागरण अभियान, नेपालका संयोजक डा. भीम रावलको जिम्मेवारी लगायतका विषयमा आपसी सहमतिवाट टुंगो लगाउने ।
(५) पार्टी विधान, राजनीतिक प्रतिवेदन र कार्यक्रम लगायतका दस्तावेजहरु आपसमा मिलेर तयार गर्ने ।
(६) पार्टीको सञ्चालन विधान, विधि पद्धति र लोकतान्त्रिक मान्यताको आधारमा गरिने । सामूहिक नेतृत्व र जनवादी केन्द्रीयताको अनुशरण गरिने ।
(७) पार्टी एकीकरणको लागि विभिन्न तहमा आवश्यकता अनुसार कार्यदल गठन गर्ने ।
