काठमाडौँ – २४, भदौ ।

राष्ट्रिय स्वतन्त्र पार्टी (रास्वपा) का सबै सांसदहरुले आज सामूहिक राजीनामा दिने घोषणा गरेका छन् । देशमा व्याप्त भ्रष्टाचार, कानूनी शासनको अवहेलना, अभिव्यक्ति स्वतन्त्रतामाथि भएको आक्रमण र सरकारले गरेको दमनकारी कार्यको विरोध स्वरूप यस्तो निर्णय गरिएको रास्वपा संसदीय दलले जनाएको छ ।

सार्वजनिक विज्ञप्तिमा रास्वपाले सामाजिक सञ्जाल बन्द गरी नागरिक अधिकार खोसिएको र निहत्था युवामाथि शान्तिपूर्ण आन्दोलनकै क्रममा सरकारले गरेको ‘आमहत्याको प्रयास’प्रति घोर आपत्ति जनाएको छ । पार्टीले वर्तमान सरकारको औचित्य समाप्त भइसकेको दाबी गर्दै तत्काल प्रधानमन्त्रीको राजीनामा, उच्चस्तरीय न्यायिक छानबिन आयोग गठन, सर्वपक्षीय नागरिक सरकारको व्यवस्था तथा जिम्मेवार मन्त्रीहरू सहित काठमाडौंका प्रमुख जिल्ला अधिकारीलाई बर्खास्त गरी कानुनी कारबाही गर्न माग गरेको छ ।

त्यसैगरी, संविधान संशोधनको प्रक्रिया सुरु गर्नुपर्ने र ठूला भ्रष्टाचार काण्डहरूको छानबिनका लागि अधिकार सम्पन्न आयोग गठन गर्नुपर्ने रास्वपाको माग छ ।

संसदीय दलका नेता रवि लामिछाने, पूर्वनेता डोलप्रसाद अर्याल, उपनेता विराजभक्त श्रेष्ठ, प्रमुख सचेतक सन्तोष परियार, सचेतक निशा डाँगीलगायत २० सांसदहरुको सामूहिक हस्ताक्षरसहितको निर्णयमा रास्वपा दल एकमत भएको विज्ञप्तिमा उल्लेख गरिएको छ ।

रास्वपाले सरकारले हत्या गरेका ‘जेन जेड’ आन्दोलनका युवाप्रति श्रद्धाञ्जली अर्पण गर्दै घाइतेहरुको निःशुल्क उपचारको माग समेत गरेको छ ।