रुकुम पश्चिम -२९, असार ।
रुकुम पश्चिममा भानु जयन्तीको अवसरमा आयोजना गरिएको अन्तर माध्यमिक विद्यायस्तरीय कविता प्रतियोगितामा सिम्रुतु माविकी मेनुका ओली प्रथम भएकी छन् । २ सय १२ औँ भानु जयन्तीको अवसरमा आयोजित कविता प्रतियोगितामा ३८ जना प्रतिस्पर्धीमा ७२.५ अङ्क प्राप्त गरी कक्षा १२ मा अध्ययनरत ओली प्रथम भएकी हुन् ।
राप्ती साहित्य परिषद् जिल्ला शाखा रुकुम पश्चिमले आयोजना गरेको प्रतियोगितामा साधारण मावि मुरुडाँडा, कक्षा १० मा अध्ययनरत चाहना पुन ७२ अङ्कका साथ द्वितीय र अन्धनाशक मावि खुम्चेरी कक्षा ११ मा अध्यनरत चेतन खड्का ६८.५ अङ्कका साथ तृतीय भएको परिषद्का अध्यक्ष मनलाल ओलीले बताए ।
प्रतियोगितामा बाल शिक्षा मावि गैरिनेटा, कक्षा १० मा अध्यनरत जेरी डाँगीले ६८ अङ्क र ६७ अङ्क सहित प्रकृति ओली सान्त्वना भएका छन् ।
प्रथम स्थान देखि सान्त्वना हुनेलाई विभिन्न व्यक्तित्वले पुरस्कारको रुपमा शैक्षिक सामग्री प्रदान गरेका छन् । प्रथम स्थानका लागि सिम्रुतु क्याम्पसका उपप्राध्यापक चन्द्रा ओली, द्वितीय स्थानका लागि देवकुमार ओली ‘साहित्यप्रेमी’, तृतीय स्थानका लागि कर्ण बहादुर बोहरा र सान्त्वनाका लागि डिल्ली बहादुर मल्लले पुरस्कारको व्यवस्था गरेको बताइएको छ ।
कविता प्रतियोगितामा त्रिवेणी गाउँपालिकाका १० वटा माध्यमिक विद्यालयबाट ३८ जनाको सहभागिता रहेको बताइएको छ ।
त्रिवेणी माध्यामिक विद्यालय सिम्रुतुमा आयोजित कविता प्रतियोगिताको मूल्याङ्कन साहित्यकार गिरी प्रसाद बुढा, मुकन्द शर्मा र शसिराम घर्तीले गरेका थिए ।
परिषद्का अध्यक्ष मनलाल ओलीको अध्यक्षतामा आयोजित कविता प्रतियोगितामा त्रिवेणी गाउँपालिका अध्यक्ष गणेश कुमार केसीको प्रमुख आतिथ्यता तथा नेपाल सरकारका पूर्व सचिव भरतकुमार शर्मा, साहित्यकार गिरिप्रसाद बुढा र रुकुमेली बाङमय अधिष्ठानका सचिव पूर्ण ओलीको विशेष आतिथ्यता रहेको थियो । कार्यक्रममा भानु विशेष कार्यपत्र समालोचक मुकुन्द प्रसाद शर्मा प्रस्तुत गरेका थिए ।
राप्ती साहित्य परिषद्का सचिव ओमबहादुर खत्रीको सञ्चालनमा सम्पन्न कविता प्रतियोगितामा शिक्षक, विद्यार्थी, साहित्यकार, पत्रकार लगायतको उपस्थित रहेको जनाइएको छ ।
